Enginn mun ná meirihluta

Kosningabaráttan í Úkraínu er nú í algleymingi fyrir kosningarnar sem fram fara í landinu um helgina. Fyrrverandi forsætisráðherra landsins, Julia Tymochenko, ávarpaði stuðningsmenn sína á torgi í Kiev í gær. Þar sagði hún meðal annars að þjóðin eigi á hættu að tapa aftur því sem ávannst með „appelsínugulu" byltingunni árið 2004 þegar núverandi forseti Úkraínu, Viktor Júsjenko, komst til valda. Tymochenko var forsætisráðherra í ríkisstjórn Júsjenko en hann rak hana úr embætti síðastliðið haust vegna meintrar spillingar, bæði á fjármála- og pólitíska sviðinu. Samkvæmt nýjustu könnunum mun enginn flokkur ná meirihluta í kosningunum á sunnudag.