Heima­menn í Kanada björguðu stigi í lokin

Gestgjafar Kanada gerðu jafntefli í fyrsta leik sínum á heimsmeistaramótinu í fótbolta eftir að hafa verið lengi undir. Baráttuglaðir Bosníumenn voru nálægt sigri.

Kanada og Bosnía gerðu 1-1 jafntefli í Toronto í kvöld í opnunarleiknum í Kanadahluta HM.

Þetta var mikill baráttuleikur og mikið um harðar tæklingar og brot. Bæði lið gáfu ekkert eftir en urðu á endanum að sætta sig við eitt stig.

Jovo Lukic kom Bosníu í 1-0 strax á 21. mínútu með skallamarki eftir að Sead Kolasinac framlengdi hornspyrnu fyrir markið.

Bosníumenn voru yfir í 57 mínútur eða þar til varamaðurinn Cyle Larin jafnaði metin á 78. mínútu. Hann fékk boltann snéri sér laglega og skaut boltanum á lofti í markið.

Larin hafði komið inn á völlinn sem varamaður aðeins tveimur mínútum fyrr.