Viktor fékk víti en skelfi­leg mar­tröð FCK heldur á­fram

Rúnar Alex Rúnarsson hélt sæti sínu í marki FCK en þurfti líkt og í síðasta leik að sætta sig við að sækja boltann tvívegis í netið.

Bæði mörk gestanna komu í fyrri hálfleik og það var ekki fyrr en seint í uppbótartíma, eftir að Viktor Bjarki Daðason var mættur inná, sem FCK minnkaði muninn. 

Dæmd var vítaspyrna vegna brots á Viktori og Youssoufa Moukoko skoraði úr vítinu en það dugði skammt, jafnvel þó að Fredericia missti á sama tíma Svenn Crone af velli með rautt spjald fyrir brotið á Viktori.

Þar með hefur FCK tapað sjö af síðustu átta leikjum sínum og gert eitt jafntefli. Hrun liðsins hafði í för með sér að það endaði í fallhlutanum þegar deildinni var skipt upp, og er FCK aðeins með 29 stig úr 24 leikjum, sex stigum frá fallsæti.