Zidane gat ekki stöðvað för Nígeríu í undan­úr­slit

Ákveðin óvissa hafði ríkt um nígeríska liðið þegar leikmenn liðsins neituðu að ferðast í leikinn til að mótmæla því að hafa ekki fengið bónusgreiðslur sem þeim hafði verið lofað.

Þau mál voru hins vegar útkljáð og Nígeríumenn unnu með sannfærandi hætti í dag, þar sem mörk frá Victor Osimhen og Akor Adams á fyrstu tólf mínútum seinni hálfleiks skildu liðin að.

Mörkin hefðu getað orðið fleiri hjá Nígeríu en Luca Zidane þótti standa sig vel í marki Alsír, fyrir framan pabba sinn, goðsögnina Zinedine Zidane, sem fylgdist með úr stúkunni.

Seinna í kvöld mætast Egyptaland og Fílabeinsströndin í lokaleik 8-liða úrslitanna og mun sigurliðið þar mæta Senegal í undanúrslitum.