Stofna vinnu­hóp til að sporna gegn of­beldi í garð verslunar­manna

Í fréttatilkynningu á vef LÍV segir að minnisblað þess efnis hafi verið undirritað í dag. Vinnuhópinn skipi bæði fulltrúar launafólks og atvinnurekenda.

„Verkefni hópsins eru meðal annars að draga fram þær áskoranir og hættur sem varða öryggi starfsfólks verslana. Vinnuhópurinn mun taka saman yfirlit yfir aðgerðir sem fyrirtæki hafa gripið til, verklag og viðmið sem gagnast gætu öðrum fyrirtækjum og starfsfólki þeirra. Þá mun hópurinn setja saman lista með hugmyndum um önnur viðbrögð eða vinnulag sem gagnast gæti í baráttunni gegn ofbeldi í verslun.“ segir í fréttatilkynningu. 

Þá er vakin athygli á því að samkvæmt niðurstöðum könnunar VR meðal félagsfólks hefur yfir helmingur allra VR félaga orðið fyrir áreitni eða ofbeldi í starfi á starfsferlinum, eða 54 prósent . Svipað hlutfall eigi við um sölu- og afgreiðslufólk.

Fyrirhugað er að starfi vinnuhópsins ljúki fyrir lok október 2025. Fram kemur að LÍV, VR og SVÞ muni nýta niðurstöðurnar til frekara samstarfs og samtals við stjórnvöld.