Lofar áður ó­séðu sjónar­spili en ekki kántrí ælu

„Við ætlum að koma texta lagsins til skila uppi á sviði, það verður ákveðin ljósasýning og margar staðsetningar sem þurfa að vera réttar,“ segir Tinna í samtali við Vísi. Hún vill eðli málsins samkvæmt á sama tíma ekki gefa of mikið upp um atriðið áður en hún stígur á svið. Tinna segir listræna stjórnendur keppninnar þau Thomas Benstem og Selmu Björns hafa verið sér stoð og stytta og komið með geggjaðar hugmyndir að atriði.

Snýst um sýninguna

„Mér skilst að þetta hafi ekki sést áður með þessum hætti í keppninni. Svo veit ég ekki einu sinni sjálf hvernig þetta mun koma út en Thomas var með allskonar rosalegar hugmyndir og svo fengum við það samþykkt. Textinn eftir hana Guðnýju Ósk mun lifna við á sviðinu, mér þykir sjúklega vænt um textann og við fengum rými til að segja ákveðna sögu uppi á sviði.“

Tinna segir lag sitt sem heitir Þrá á íslensku en Words á ensku fjalla um einhverskonar ástarfár og innri baráttu við að þekkja sitt eigið virði. Lagið er sannkallað kántrílag en Tinna segist þrátt fyrir það ekki hafa viljað of mikinn kántrífíling í atriðinu uppi á sviði og þá er hún heldur enginn sérstakur kántríaðdándi.

„Selma og Tómas hafa komið með geggjaðar hugmyndir en ég vildi aldrei neitt kántrídæmi uppi á sviði svo að við myndum alveg örugglega ekki hreinlega æla kántríi yfir fólk,“ segir Tinna hlæjandi.

„Svo hef ég aldrei hlustað á kántrí, jú jú vissa týpu af því en ég vildi fyrst og fremst leggja mikið púður í sviðsetninguna, því að þó að þetta sé lagakeppni þá er þetta fyrst og fremst eitt stórt show og ég vil skemmta fólki.“

Syngur sjálf miklu frekar „lúðaleg“ lög

Tinna samdi lagið ásamt breska tónlistarmanninum Rob Price. Honum kynntist hún í gegnum sameiginlegan vin sem hún keppti með í Idol á Stöð 2 um árið. Tinna útskýrir að hún hafi verið komin með laglínu á heilann og Rob svo séð um taktinn, úr hafi orðið að lagið hafi orðið kántrílag.

„Svo er kántrítónlist auðvitað mjög vinsæl þessa dagana og ákveðin bylgja í gangi. Tónlistin sem ég syng sjálf er í raun ógeðslega lúðaleg og myndi ekkert eiga heima í Söngvakeppninni,“ segir Tinna hlæjandi. Hún segist hrífast mest af íslenskum ljóðum og að draumurinn sé að gefa einn daginn út ljóðaplötu.

„Sem er ógeðslega leiðinlegt, en það er það sem ég geri! Ég elska ljóð, kann þau öll og hef kunnað síðan ég var lítið barn. Mig hefur alltaf langað til að gefa út gömul íslensk lög, það er kannski eitthvað fyrir framtíðina.“

Tinna segir það lengi hafa verið draum að taka þátt í Söngvakeppninni. Þau Rob sendu inn lag í keppnina í fyrr en áttu þá ekki erindi sem erfiði. Nú hafi Rúnar Freyr Gíslason framkvæmdastjóri keppninnar hinsvegar haft samband.

„Þetta var svekkelsi í fyrra, en eftir á að hyggja er ég mjög feginn, lagið okkar er betra í ár og þetta hentar mér betur, ég var með lítið barn í fyrra og þetta hefði kallað á rosa mikla fjarveru. Svo hringdi Rúnar í mig í lok nóvember, sem var geðveikt en líka svo skrýtið því maður var búinn að bíða svo lengi eftir þessu mómenti, sá fyrir sér að þetta yrði kannski umslag eða eitthvað,“ segir hún hlæjandi.

Heyrt um líkindin

Þó nokkuð hefur verið rætt um líkindi framlags VÆB bræðra í Söngvakeppninni við ísraelskt popplag. Þá hefur lag Tinnu þar einnig borið upp á góma, til að mynda í útvarpsþættinum Reykjavík síðdegis þar sem því hefur verið líkt við hið gríðarlega vinsæla kántrípopplag Austin eftir Dasha. Tinna segist kannast við þessa umræðu.

„Jú, maður hefur heyrt þetta. En laglínan kemur úr hausnum á mér sjálfri og ég var auðvitað ekki að stela einhverju lagi,“ segir Tinna létt í bragði. Hún segist heyra líkindin en þó séu hlutar í hennar lagi allt öðruvísi.

„Við erum með allt öðruvísi millikafla sem dæmi. Auðvitað er þetta bara ógeðslega leiðinlegt en fólk segir bara svona og ég vil fyrst og fremst að fólk njóti!“

Tinna var stödd á Kanarí þegar Vísir náði af henni tali, að hlaða batteríin fyrir komandi törn. En er hún eitthvað stressuð fyrir stóra kvöldinu?

„Veistu það, ég er bara geðveikt peppuð. Ég keppti í fimleikum í tuttugu ár og ég var alltaf stressuð að keppa, en núna líður mér einhvern veginn eins og ég hafi fulla stjórn á þessu. Ég veit ekki af hverju ég er svona góð með mig, mér líður eins og það geti ekkert klikkað,“ segir Tinna hlæjandi.

„En ég veit að rétt áður en ég stíg á svið þá mun ég fá fiðring í magann. En við notum reynsluna úr Idol og úr fimleikunum, þar sem maður lærði að keppa og standa sig.“