„Girtu þig nú í brók og horfstu í augu við sjálfan þig“

Þetta segir Kári í skoðanagreininni „Það er allt í lagi að vera þú sjálfur“ sem birtist á Vísi fyrr í dag. Undirtitill greinarinnar er „Opið bréf til Snorra Mássonar“ og skrifar Kári undir bréfið sem aðdáandi Snorra, jafnt nú sem áður.

Kári byrjar bréfið á að rifja upp þær aðstæður sem hafa reynst honum hvað erfiðastar og haft ófyrirsjáanleg áhrif á hann: kaup á nýjum skóm. Hann hafi fest kaup á fallegustu skóm sem hægt sé að ímynda sér og síðan lent í alls konar vanda eftir nokkur skref. 

Kári segist síðan hræddur að ergelsi Snorra út í Rúv sem birtist í myndbandi á samfélagsmiðlum sé ein af birtingarmyndum þess að hann sé búinn að koma sér í nýjar aðstæður sem séu svo framandi að hann eigi erfitt með að þeim sé lýst af óháðum aðila.

Verði að horfast í augu við sig sem frambjóðanda Miðflokks

Kári vísar þar í myndband Miðflokksins sem birtist bæði á TikTok og X. Þar tekur Snorri fyrir umfjöllun Rúv um Miðflokkinn þar sem flokkurinn er sagður vera líklega lengst til hægri af flokkum á þingi. 

Snorri snýr myndbandinu á haus og segir Rúv líklega lengst til vinstri á hinum pólitíska kvarða á Íslandi.

Hann svarar svo umfjöllun Rúv um stefnu Miðflokksins í hælisleitendamálum þar sem yfirlýsta stefna flokksins er sögð vera að enginn komi til landsins. Snorri segir að þarna sé ekki tekið fram að flokkurinn vilji hafa stjórn á málunum og bjóða fólki í raunverulegri neyð til landsins.

Kári segir að Snorra finnist vegið að flokknum en hins vegar sé það boðskapur Miðflokksins að engir hælisleitendur komi til landsins. Eðli Miðflokksins endurspeglist í þeim boðskap og segir Kári ljóst að Snorra finnist Rúv ekki hafa átt að segja frá því.

„Snorri Másson þú verður að læra að horfast í augu við þig sem frambjóðanda Miðflokksins. Þú ert kominn í Miðflokkinn og mátt ekki láta í það skína að þér líki illa við stefnu hans með því að kvarta undan fjölmiðli sem segir frá henni,“ skrifar Kári.

„Girtu þig nú í brók“

Einnig nefnir Kári hvernig Snorri gagnrýni það að Rúv segi að Miðflokkurinn hafi efasemdir um hnattræna hlýnun af mannavöldum og vilji draga úr öllum loftlagsaðgerðum sem þeir segi að skili engu. 

„Það er ljóst af viðbrögðum þínum að þér finnst það beinlínis árás á Miðflokkinn að segja frá þessu stefnumáli hans,“ skrifar Kári. 

Þá segir Kári að Snorri verði að sætta sig við að orð starfsmanns RÚV voru lögð honum í munn af Miðflokknum og segist Kári skíthræddur um að félagar Snorra í Miðflokknum fari að veitast að honum fyrir að mislíka við stefnuna. 

„Þú ert orðinn frambjóðandi fyrir flokk sem hefur að stefnu málefni sem þér finnst hljóma illa, girtu þig nú í brók og horfstu í augu við sjálfan þig og þar með heiminn eins og hann er,“ skrifar Kári.

Faðirinn vitjaði hans í draumi

Loks rifjar Kári upp hvernig faðir hans, Stefán Jónsson alþingismaður, vitjaði hans í draumi í gær. Þeir hafi þar rætt um það hvernig stefnumál Miðflokksins valda Snorra sársauka.

„Faðir minn svaraði því til að það væri nokkuð algengt að stjórnmálamenn fengju óbeit á stefnumálum flokka sem þeir væru í og þá gerðu þeir gjarnan annað af tvennu, skiptu um flokk eða kenndu RÚV um vandann,“ skrifar Kári.

Stefán hafi síðan sagt: „Segðu honum að heimurinn sé eins og hann sé og það þýði ekkert fyrir hann að reyna að tala sig frá honum, endanlega sjá allir að um plat sé að ræða“ og beðið Kára um að færa Snorra eftirfarandi vísu:

Platið aldrei er til neins

ekkert býr til gaman

horfðu nú á heiminn eins

og heimurinn er í framan