Kjör­bíllinn þræðir sunnan­verða Vest­firði í sam­einingar­kosningum

Starfsmenn Heilbrigðisstofnunar Vestfjarða og leikskólans Arakletts greiddu atkvæði í Kjörbílnum á föstudaginn var og í dag verður kjörbíllinn við Odda á Patreksfirði, og á morgun hjá Arnarlaxi á Bíldudal.

Ólafur Þór Ólafsson, sveitarstjóri Tálknafjarðarhrepps, segir það spennandi nýjung í kosningum að geta boðið upp á færanlegan kjörstað. „Það skilar sér vonandi í bættri kjörsókn og verður til þess að fólk sem annars er ólíklegra til að kjósa taki þátt. Það skiptir nefnilega miklu máli að það sé góð þátttaka þegar lýðræðislegar ákvarðanir eru teknar,“ segir Ólafur Þór.

Íbúakosning um sameiningu Tálknafjarðarhrepps og Vesturbyggðar hófst mánudaginn 9. október og stendur til og með 28. október. 

Kosningin er með heldur óvenjulegu fyrirkomulagi þar sem nýjum reglugerðum um íbúakosningar er fylgt. Bæði er hægt að kjósa á kjörstað en líka með póstkosningu og þá geta allir þeir sem náð hafa 16 ára aldri kosið. 

Alls eru eitt þúsund og fimm manns eru á kjörskrá - tvö hundruð á Tálknafirði og 805 í Vesturbyggð. 

Á föstudaginn var höfðu 139 kosið, eða um 14 prósent, og þar af greiddu 36 atkvæði í kjörbílnum.