Innlent

Til­kynnt um grun­sam­legar manna­ferðir og mann með öxi

Hólmfríður Gísladóttir skrifar
Lögregla sinnti alls konar útköllum í nótt.
Lögregla sinnti alls konar útköllum í nótt. Vísir/Vilhelm

Lögreglan á höfuðborgarsvæðinu sinnti nokkuð fjölbreyttum verkefnum í gærkvöldi og nótt, þar sem menn voru almennt að valda vandræðum. Í sumum tilvikum var hins vegar enga að finna þegar mætt var á staðinn.

Miðsvæðis í borginni var tilkynnt um tvo menn sem höfðu lokað sig inni á salerni hótels en þeir voru á bak og burt þegar lögregla mætti á staðinn. Sömu sögu var að segja um útkall sem lögregla sinnti vegna grunsamlegra mannaferða í garði en enginn fannst við leit.

Þá barst lögreglu tilkynning um mann með öxi, sem var sagður vera að valda skemmdum, en í tilkynningu segir aðeins að engin öxi hafi fundist. Málið sé þó í rannsókn.

Einn var handtekinn á veitingastað þar sem hann var með ógnandi hegðun, sá var vistaður í fangageymslu þar sem ekki reyndist unnt að ræða við hann. Þá var annar vistaður í fangageymslu vegna ölvunar og ónæðis og enn einum vísað út af bar þar sem hann hafði verið til vandræða.

Annars staðar í höfuðborginni barst tilkynning um ungmenni að skemma rútu. Skemmdir eru sagðar hafa verið töluverðar og er málið í rannsókn.

Nokkrir voru handteknir grunaðir um akstur undir áhrifum áfengis eða fíkniefna.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×