Þóttist ekki skilja ensku til að sleppa við treyjuskipti við Ástrala

Frakkar unnu öruggan sigur á Áströlum, 4-1, í fyrsta leik sínum í D-riðli heimsmeistaramótsins. Ástralska liðið náði forystunni en það franska svaraði með fjórum mörkum. Giroud skoraði tvö þeirra.

Eftir leikinn vildi Jason Cummings, framherji ástralska liðsins, skiptast á treyjum við Giroud. Sá franski brá hins vegar á það ráð að þykjast ekki skilja ensku til að forðast að þurfa að afhenda Cummings treyjuna sína.

Giroud spilaði níu ár á Englandi og ætti því að vera nokkuð sleipur í enskunni, allavega nógu góður til að skilja beiðni Cummings. En hann hafði greinilega engan áhuga á að láta hann fá treyjuna sína.

Cummings er fæddur og uppalinn í Skotlandi. Hann lék með yngri landsliðum Skota og tvo leiki fyrir A-landsliðið áður en hann ákvað að spila fyrir Ástrali. Móðir hans er fædd í Perth í Ástralíu og því átti hann kost á því að spila fyrir ástralska landsliðið.

Cummings lék sinn fyrsta landsleik fyrir Ástralíu í september og skoraði í honum, 2-0 sigri á Nýja-Sjálandi. Leikurinn gegn Frakklandi var sá eini sem hann spilaði á HM.