Byggingar­krani féll á Akra­nes­höllina

Skessuhorn greinir frá þessu. Kraninn fór í gegnum loft hallarinnar og myndaði stórt gat. Samkvæmt blaðamanni Skessuhorns heyrðust rosalegar drunur og skruðningar inni í höllinni er kraninn féll. 

Fulltrúar frá Akraneskaupstað og lögregla mættu á svæðið eftir að kraninn féll og tóku ákvörðun um að loka höllinni þar til annað kemur í ljós. 

Í samtali við fréttastofu segir Guðmunda Ólafsdóttir, framkvæmdastjóri ÍA, að enginn hafi orðið vitni að atvikinu nema verktakarnir. Yfirþjálfari félagsins sem var með fimmtíu krakka á æfingu í höllinni brást hárrétt við eftir að kraninn féll. 

„Að sjálfsögðu var þeim brugðið við höggið en hann brást rétt við og þau röltu út. Verktakinn, Verkís og starfsmenn bæjarins komu strax og leystu málin. Tæmdu höllina með okkur og við læsum bara,“ segir Guðmunda.