Erlent

Ætla ekki að reyna aftur í bráð

Samúel Karl Ólason skrifar
Ljósmyndarar pakka saman eftir að ákveðið var að hætta við geimskotið í gær.
Ljósmyndarar pakka saman eftir að ákveðið var að hætta við geimskotið í gær. AP/Chris O'Meara

Starfsmenn Geimvísindastofnunar Bandaríkjanna (NASA) munu ekki reyna að skjóta Artemis-1 af stað til tunglsins á næstu dögum. Til stendur að flytja Space Launch System-eldflaugina og Orion geimfarið aftur af skotpalli í Flórída, náist ekki að laga leka sem kom á tanka eldflaugarinnar á skotpallinum.

Til stóð að gera aðra tilraun til að skjóta geimfarinu á loft í gær en hætt var við þegar leki greindist á einum af eldsneytistönkum eldflaugarinnar og ekki tókst að stöðva hann. Síðastliðinn mánudag var hætt við fyrstu tilraunina vegna þess að ekki gekk að lækka hitastig eins af fjórum aðalhreyflum SLS-eldflaugarinnar eins og til þarf fyrir geimskot.

Sjá einnig: Hættu við aðra tilraun vegna leka

Næsta tímabil þegar staða jarðarinnar og tunglsins er á þann veg að hægt er að skjóta geimfarinu af stað er frá 19. september til 4. október. Skotglugginn svokallaði mun opnast fjórtán sinnum á því tímabili.

Þúsundir höfðu komið sér fyrir nærri skotpallinum í Flórída til að fylgjast með geimskotinu.AP/Brynn Anderson

SpaceFlightNow segir að til standi að senda nýja áhöfn til Alþjóðlegu geimstöðvarinnar þann 3. október og því er óljóst hvort Artemis-1 geti verið skotið á loft á þessu tímabili.

Eftir 4. október verður ekki hægt að skjóta Artemis-1 af stað fyrr en 17. október. Yfirlit yfir hvenær hægt er að skjóta geimfarinu til tunglsins má sjá hér á vef NASA.

Í yfirlýsingu á vef NASA segir að næstu daga verði lekinn skoðaður nánar og ákvörðun um hvenær hægt verði að reyna aftur tekin í kjölfar þess.

Fyrsta geimskotið af mörgum

Þetta geimskot kallast Artemis-1. Um borð í Orion-geimfarinu verður mikið af vísindabúnaði sem vísindamenn vonast til að geta notað við undirbúning mannaðra geimferða framtíðarinnar.

Auk vísindabúnaðar verða þrjár gínur um borð. Þær kallast Commander Moonikin Campos, Helga og Zohar. Campos verður búinn fjölmörgum skynjurum og íklæddur sama búning og geimfarar munu vera í á næstu árum.

Hér má sjá helstu vendipunkta Artemis-1.

Umborð eru einnig smáir gervihnettir sem verða meðal annars notaðir til að leita að vatni á tunglinu og kortleggja yfirborð þess.

Í næsta geimskoti áætlunarinnar, Artemis-2 verður farin svipuð ferð en þá verða menn um borð. Í Artemis-3 verður svo reynt að lenda mönnum á yfirborði og verður það í fyrsta sinn sem menn fara til tunglsins frá Appollo-17 árið 1972. Vonast er til þess að Artemis-3 fari á loft árið 2025 eða 2026.

Gríska gyðjan Artemis er systir guðsins Apollos. Eins og frægt er var það nafn verkefnisins sem sneri að tunglferðunum sem farnar voru á árum áður.

Bandaríkin Geimurinn Tunglið Artemis-áætlunin

Tengdar fréttir

Opin­ber­uð­u hverj­ir þróa geimb­ún­ing­a fram­tíð­ar­inn­ar

Geimvísindastofnun Bandaríkjanna (NASA) hefur gert samninga við Axiom Space og Collins Aerospace um þróun og framleiðslu geimbúninga og búnaðar til geimgangna. Þennan búnað eiga meðal annars geimfarar Artemis-áætlunarinnar að nota á braut um jörðu og á yfirborði tunglsins.

Hættu æfingu fyrir tunglferð vegna bilunar

Vísindamenn og verkfræðingar Geimvísindastofnunnar Bandaríkjanna lýstu því yfir í kvöld að búið væri að hætta við æfingu fyrir fyrstu tunglferð Artemis-áætlunarinnar. Það var gert eftir að tvær bilanir komu upp þegar verið var að dæla eldsneyti á Space Launch System-eldflaugina (SLS).

Annað hvort dreifum við okkur um Vetrarbrautina eða deyjum út

Mannkynið er dauðadæmt, dreifi það sér ekki um sólkerfið og jafnvel lengra en það. Án þess að mannkynið verði tegund margra reikistjarna er tölfræðilega óhjákvæmilegt að það muni þurrkast út. Hvort sem það gerist á næstu áratugum eða jafnvel milljörðum ára, þá munum við deyja og jörðin þurrkast út.

NASA horfir lengra út í geim

Forsvarsmenn Geimvísindastofnunar Bandaríkjanna (NASA) hafa ákveðið að gera breytingar á starfseminni, sem eiga að stjórna áherslum opinberra geimferða næstu áratugina. Markmiðið er að leggja meiri áherslu á lengri geimferðir og þróun tækni sem þarf til þeirra.

NASA semur við SpaceX um að lenda geimförum aftur á tunglinu

Geimvísindastofnun Bandaríkjanna, NASA, hefur samið við fyrirtækið SpaceX um þróun á lendingarfari sem notað verður til að lenda mönnum á tunglinu. Starfsmenn fyrirtækisins, sem er í eigu auðjöfursins Elon Musk, munu þróa sérstaka tegund Starship geimskipsins og nota það til að lenda tveimur bandarískum geimförum á tunglinu á næstu árum.

Geimfararnir sem stefna á tunglið

Geimvísindastofnun Bandaríkjanna (NASA) opinberaði í gær hóp geimfara sem hafa verið valdir til að taka þátt í Artemis áætluninni. Hún snýr að því að hefja mannaðar geimferðir til tunglsins á nýjan leik og nota það sem stökkpall fyrir geimferðir lengra út í sólkerfið og þá sérstaklega til mars.

Mest lesið


Fleiri fréttir

Sjá meira


×

Mest lesið