Taka við búskap á síðasta bóndabænum í Reyðarfirði

Kristján Már Unnarsson skrifar 17. júlí 2022 22:11

Guðjón Már Jónsson og Þuríður Lillý Sigurðardóttir ásamt dótturinni Dagbjörtu Ósk, tveggja ára. Sigurjón Ólason

Síðasti bóndinn í hinum forna Reyðarfjarðarhreppi, sem er að hætta eftir hálfrar aldar búskap, spáir því að sauðfjárrækt leggist af sem atvinnugrein á Íslandi á næstu tuttugu til þrjátíu árum. Dóttir hans og tengdasonur ætla þó að taka við.

Í fréttum Stöðvar 2 hittum við á bændur í heyskap á bænum Sléttu í Reyðarfirði, sem er skammt fyrir innan samnefnt kauptún. Á traktornum er Sigurður Baldursson að slá en hann tók við jörðinni fyrir hálfri öld.

Séð yfir bæjarstæðið á Sléttu í Reyðarfirði.Sigurjón Ólason

„Það hefur gengið svona heldur treglega. Þurrkar hafa verið frekar stopulir. Aldrei komið nema svona einn og einn og hálfur dagur í einu,“ svarar Sigurður þegar við spyrjum um heyskapinn, sem hófst 4. júlí hjá þeim.

„Núna er búið að vera blautt og kalt. En síðustu tvö sumur voru náttúrlega bara eins og að vera á Spáni. Þannig að maður getur ekki fengið allt,“ svarar bóndadóttirin Þuríður Lillý Sigurðardóttir, sem jafnframt er bæjarfulltrúi í Fjarðabyggð.

Þau segja sprettuna þó hafa verið góða en nú þurfti að setja kraft í heyskapinn því grasið sé að spretta úr sér.

„Því miður þá er þetta orðið svolítið skriðið og farið að harðna, stöngullinn. En maður verður bara að gera gott úr því,“ segir Þuríður.

Sláttur á bænum Sléttu. Sigurður Baldursson á traktornum.Sigurjón Ólason

Á þessum bæ eru að verða kynslóðaskipti. Þuríður og sambýlismaður hennar, Guðjón Már Jónsson, eru búin að reisa sér nýtt íbúðarhús. Hér er fimmhundruð kinda bú.

„Jú, við erum að fara að taka við búinu af foreldrum hennar,“ segir Guðjón Már, sem jafnframt starfar sem verkstjóri hjá VHE.

„Að taka við sauðfjárbúi eins og staðan er núna, það er ekkert hver sem er kannski sem leggur í það. En við erum stutt frá Reyðarfirði og við getum þá sótt okkur vinnu með þar, ef á reynir,“ segir Þuríður.

Dagbjört Briem Gísladóttir segist áfram ætla að sinna hestum og hænsnum á Sléttu.Sigurjón Ólason

„Þegar ég var að taka við upp úr 1970 þá er búið hér á fimmtán jörðum. En ég hef lifað þá alla. Þannig að þetta er svolítið í hnotskurn sagan,“ segir Sigurður.

En hvernig líst eiginkonu hans, Dagbjörtu Briem Gísladóttur, á að láta búskapinn í hendur dótturinnar og tengdasonar?

„Bara vel. Er ekki gott að ungt fólk er að taka við í sveitum og að einhverjir vilji koma að þessu?“ svarar Dagbjört.

Sigurður segist þó svartsýnn á framtíð sauðfjárræktar.

Spjallað við Sigurð Baldursson á hlaðinu.Sigurjón Ólason

„Þetta muni smám saman leggjast af sem atvinnugrein, svona á næstu tuttugu þrjátíu árum. Þá held ég að þetta verði að mestu búið, nema bara sem hobbí með einhverju öðru.

Það eru bara svo litlar tekjur í þessu. Þetta er mikill kostnaður og mikil fjárbinding.

Fjallskilin, þau eru mjög erfið þegar fækkar víða. Ég veit bara um menn sem eru að guggna núna vegna þessa,“ segir Sigurður.

Unga fólkið segist þó treysta á hjálp vina og vandamanna við smölun.

„Hjá okkur allavega, meðan fólk nennir að koma að smala með okkur og fyrir okkur þá erum við allavega í góðum málum,“ segir Þuríður Lillý.

Hér má sjá frétt Stöðvar 2:

Landbúnaður Fjarðabyggð Byggðamál Um land allt

Tengdar fréttir

Mikil fækkun búa ógnar dreifðri byggð

Búum í landbúnaðargreinum hefur fækkað um 375 á landinu frá árinu 2008 til 2020. Formaður bændasamtakanna hefur áhyggjur af fækkun búa sem hann segir stoð dreifðari byggða.

4. júní 2022 12:29

Dásamlegt að vera sauðfjárbóndi

Botnótt og golsótt lömb eru í miklu uppáhaldi hjá sauðfjárbónda á Bjarnarhöfn í Helgafellssveit á Snæfellsnesi en á búin eru fjögur hundruð og tuttugu fjár. Lömbin eru mörkuð tveggja daga gömul.

26. maí 2022 20:30

Á fáum stöðum betra að rækta sauðfé á Íslandi en á Ströndum

„Það er harðduglegt fólk hérna, er með góð sauðfjárbú og afurðirnar góðar,“ segir réttarstjórinn Ingibjörg Rósa Auðunsdóttir, bóndi á Kollsá í Hrútafirði, þegar við hittum hana í Hvalsárrétt, aðalréttum Bæhreppinga, eins og íbúar Bæjarhrepps hins forna voru jafnan kallaðir.

3. apríl 2022 05:55

Sauðfjárbændur að kikna undan verðhækkunum á áburði og olíu

Sauðfjárbændur um land allt hafa miklar áhyggjur af afkomunni eftir tvöföldun áburðarverðs og olíuverðshækkanir. Talsmaður greinarinnar óttast að ásettu fé geti fækkað um allt að fjórðung í haust. Bændur í Hrútafirði hafa þó svartan húmor og gera grín að afleitri stöðu.

28. mars 2022 23:10

Sauðfjárbóndinn segir snilld að hafa kost á annarri vinnu

Stærstu hús sem sést hafa í Kelduhverfi eru risin á jörðinni Lóni vestast í sveitinni. Þar er fyrirtækið Rifós að byggja upp seiðaeldisstöð sem orðin er stærsti vinnustaður sveitarinnar og veitir meðal annars sauðfjárbændum kærkomna búbót meðfram búskapnum.

22. mars 2022 23:13

Ullarbændur í Öxarfirði selja lopa beint frá býli

Ung hjón sem áttu sér þann draum að setjast að í sveit ásamt börnum sínum þremur ákváðu að gerast ullarbændur í Öxarfirði og selja lopaband beint frá býli. Svo vel hefur gengið að þau hafa vart undan við framleiðsluna.

14. mars 2022 22:44

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.