Sauðfjárbændur að kikna undan verðhækkunum á áburði og olíu

Í fréttum Stöðvar 2 var rætt við bændur á rótgrónu sauðfjárræktarsvæði við vestanverðan Hrútafjörð sem horfa nú upp á miklar kostnaðarhækkanir. Á Kolbeinsá reka þau Hannes Hilmarsson og Kristín Jónsdóttir sjöhundruð kinda bú en Hannes segir bæði áburð og olíu hafa hækkað gríðarlega.

„Það lítur ekki allt of vel út, sko,“ segir Kristín.

-Hafa sauðfjárbændur um landið áhyggjur?

„Ég get ekki ímyndað mér annað,“ svarar hún.

„Þetta gengur ekki svona,“ segir Hannes. „Nei, alls ekki,“ segir Kristín og hristir höfuðið.

„Það verður þá að hækka afurðirnar á móti,“ segir Hannes.

Á jörðinni Bæ 1 voru menn að endurbæta fjárhúsin. Bóndinn Heiðar Þór Gunnarsson þarf að hafa allar klær úti. Hann er jafnframt með áttatíu naut í eldi, er girðinga- og rúlluverktaki og svo skreppur hann suður á þriggja vikna fresti í aukavinnu ásamt tveimur öðrum.

„Við förum í uppskipanir hjá Fóðurblöndunni til Reykjavíkur. Þannig að sauðfjárræktin, hún allavega borgar ekki fyrir þessar framkvæmdir, eins og staðan er í dag. En það getur ekki endalaust verið dauði og djöfull,“ segir Heiðar Þór.

Staðan virðist samt bara hafa versnað. 700 milljóna króna aukastyrkur ríkisins vegna áburðarkaupa er ekki fjórðungur upp í þriggja milljarða útgjaldauka vegna tvöföldunar áburðarverðs, að sögn Unnsteins Snorrasonar, talsmanns greinarinnar hjá Bændasamtökunum.

Hann segir að breytilegur kostnaður sauðfjárbúa hafi hækkað um 30 til 40 prósent frá því í fyrra. Ekki aðeins áburður og olía hafi hækkað heldur einnig lyf og byggingavörur, eins og járn. Afurðaverð til bænda hafi á móti hækkað um tíu prósent.

Unnsteinn óttast verulegan samdrátt eftir réttir í haust, allt að 25 prósenta fækkun þess fjár sem bændur setji á vetur. Bændur muni spara við sig áburð sem þýði minna og verra fóður.

Húsfreyjan á sauðfjárbýlinu Þambárvöllum í Bitru, Stefanía Jónsdóttir, sinnir skólaakstri og sækir jafnframt vinnu á Hvammstanga 80 kílómetra í burtu. Hún gerir grín að stöðunni.

„Ég fór í skólaakstur svo maðurinn minn gæti stundað sitt áhugamál.“

-Sem er?

„Sem er bóndastarfið. Er það ekki?“

-Er það áhugamál, sem sagt?

„Hjá honum,“ segir Stefanía og hlær.

Hér má sjá frétt Stöðvar 2:

Fjallað var um samfélagið við vestanverðan Hrútafjörð í þættinum Um land allt á Stöð 2. Þáttinn má nálgast á streymisveitunni Stöð 2+. Hér má sjá kynningarstiklu: