Innlent

Fjarðarheiði gleypir öll framlög og veggjöld til jarðganga í sautján ár

Kristján Már Unnarsson skrifar
Fyrirhugaður munni Fjarðarheiðarganga í Seyðisfirði.
Fyrirhugaður munni Fjarðarheiðarganga í Seyðisfirði. Vegagerðin/Mannvit

Svo fjárfrek verða Fjarðarheiðargöng að öll framlög á fimmtán ára jarðgangaáætlun ásamt gjaldtöku af öllum göngum duga ekki til að greiða kostnaðinn. Rými til að grafa næstu göng í landinu skapast vart fyrr en í kringum árið 2040.

Fjallað var um málið í fréttum Stöðvar 2. Í nýsamþykktri fjármálaáætlun ríkisstjórnarinnar er stefnan mörkuð um hve miklum fjármunum verði varið til jarðgangagerðar og hvaðan þeir koma. Á fimmtán ára tímabili er gert ráð fyrir 25 milljarða framlögum úr ríkissjóði og að gjaldtaka af umferð skili sömu fjárhæð. Það gera 50 milljarða króna, eða 3,3 milljarða á ári.

Fyrirhuguð gangaleið undir Gagnheiði til að leysa af veginn yfir Fjarðarheiði. Við gangamunna sjást valkostir á tengivegum.Vegagerðin/VSÓ

Af þessu fimmtíu milljörðum munu Fjarðarheiðargöng þurfa 44-47 milljarða króna, samkvæmt áætlun Vegagerðarinnar. Einnig er ætlunin að greiða úr jarðgangapottinum viðhald og rekstur allra jarðganga, sem árlega kostar yfir 600 milljónir króna eða átta til tíu milljarða króna á þessum fimmtán árum. Potturinn dugar því ekki og þyrfti raunar sautján ár til að ná endum saman.

Miðað við að gjaldtaka af öðrum jarðgöngum og gröftur Fjarðarheiðarganga hefjist eftir tvö ár er því ekki að sjá að gert sé ráð fyrir að peningar verði til fyrir öðrum jarðgöngum fyrr en eftir árið 2040.

Frá snjóruðningi á Fjarðarheiði. Á sex ára tímabili frá 2015 til 2020 gerðist það að jafnaði fjóra daga að vetri að heiðin lokaðist alveg í meira en tólf klukkustundir.Stöð 2/skjáskot

Áður en svo afdrifarík ákvörðun er endanlega tekin má ætla að farið verði rækilega yfir allar forsendur en meginrökin fyrir göngum eru erfiðar vetrarsamgöngur yfir Fjarðarheiði. Samkvæmt gögnum Vegagerðinnar, sem fram koma í matsskýrslu, var fjöldi daga með skert færi í meira en 3 tíma á árunum 2015 til 2020 á bilinu 29 til 56 dagar eða að jafnaði um 40 dagar að vetri. Hér er miðað við daga þar sem þæfingur var á heiðinni, hún þungfær eða alveg lokuð.

Sé hins vegar skoðaður fjöldi daga sem heiðin var lokuð í meira en tólf tíma sést að dagafjöldinn á þessu sex ára tímabili var allt frá einum degi og upp í níu daga eða að jafnaði tæplega fjórir dagar að vetri.

Til samanburðar má geta þess að Hellisheiði milli Reykjavíkur og Hveragerðis var mun oftar lokuð lengur en í tólf tíma síðastliðinn vetur, eða í sjö daga í febrúar og tvo daga í mars.

Hellisheiði milli Reykjavíkur og Hveragerðis var oftar lokuð síðastliðinn vetur en Fjarðarheiði að meðaltali á sex ára tímabili.Stöð 2/Skjáskot

Í greinargerð jarðgangáætlunar segir að í kjölfar Fjarðarheiðarganga hefjist framkvæmdir á göngum milli Seyðisfjarðar og Mjóafjarðar og síðan frá Mjóafirði til Norðfjarðar og þannig verði komið á hringtengingu á svæðinu.

Margir telja þó að tvenn göng um Mjóafjörð ættu að koma á undan en slík göng myndu jafnframt tryggja Seyðisfirði láglendistengingu við vegakerfið allt árið um Norðfjarðargöng og Eskifjörð.

Tvenn jarðgöng milli Seyðisfjarðar og Norðfjarðar um Mjóafjörð skapa hringleið milli byggða Mið-Austurlands, rjúfa vetrareinangrun Mjóafjarðar og tryggja Seyðisfirði láglendistengingu við þjóðvegakerfið.Grafík/Sara Rut Fannarsdóttir

Miðað við hefðbundna landshlutaskiptingu í jarðgangagerð og háværar kröfur um jarðgöng í öðrum landshlutum verður þó að telja ólíklegt að eftir svo dýra framkvæmd sem Fjarðarheiðargöng að pólitísk sátt náist um að haldið verði áfram að bora fyrir austan. Með því að byrja á Fjarðarheiðargöngum má þannig telja líklegt að hringtenging helstu byggða Austurlands gæti þurft að bíða fram á miðja þessa öld.

Hér má sjá frétt Stöðvar 2:


Tengdar fréttir

Telur innviðaráðherra draga Austfirðinga á asnaeyrunum

Þingmaður Miðflokksins segir innviðaráðherra á villigötum vegna gjaldtöku í jarðgöngum landsins til að fjármagna Fjarðarheiðargöng. Ríkisstjórnin þurfi að hugsa málið til enda í stað þess að draga Austfirðinga á asnaeyrunum, að mati þingmannsins.

Ráðherra boðar gjaldtöku í öllum jarðgöngum landsins

Gjaldtaka verður tekin upp í öllum jarðgöngum landsins á næsta eða þarnæsta ári. Innviðaráðherra boðar frumvarp um málið en tekjunum er ætlað að standa undir kostnaði við Fjarðarheiðargöng sem og önnur jarðgöng í framtíðinni.

Hvetur til þess að Íslendingar grafi mörg jarðgöng samtímis

Bæjarstjóri Fjarðabyggðar, fjölmennasta sveitarfélags Austurlands, hvetur til þess að Íslendingar taki Færeyinga sér til fyrirmyndar í jarðgangagerð og grafi mörg göng samtímis. Hann segir lykilatriði að hringtengja Austfirði með jarðgöngum, - það sé eina leiðin til að tryggja framtíð Mjóafjarðar.

Vestfirðingar vilja láta bora fern ný jarðgöng

Forystumenn á Vestfjörðum telja þörf á minnst fernum nýjum jarðgöngum í fjórðungum til að koma samgöngumálum þar í viðunandi horf; einum á norðanverðum fjörðunum og þrennum á sunnanverðum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.