Í fréttum Stöðvar 2 var áfram fjallað um samgöngur Mjófirðinga en yfir vetrarmánuði treysta þeir á litla ferju sem fer tvær ferðir í viku til Norðfjarðar.
Mjóifjörður er núna hluti Fjarðabyggðar. Bæjarstjórinn Jón Björn Hákonarson er sammála Mjófirðingum um að framtíð byggðarinnar liggi ekki í ferju heldur göngum.
„Við vitum það og þekkjum. Þetta þekkja menn í Noregi þar sem ferjur eru mikið notaðar og þar sem eru eyjasamfélög og fleira.
Norðmenn segja: Unga fólkið vill heilsárs.. - það vill geta farið hvenær sem það vill. Það vill ekkert bíða eftir ferjunni, hvort sem hún er daglega eða hvernig sem það er.
Þannig að það verður ekki tryggt nema með jarðgöngum. Og því fyrr því betra,“ segir Jón Björn.
Bæjarstjórinn segir lykilatriði að hringtengja Austfirði með göngum milli Norðfjarðar og Seyðisfjarðar um Mjóafjörð og til Héraðs.
„Ég held að það sé í huga allra Austfirðinga mjög mikilvægt að við hringtengjum okkur. Og inn í því er Mjóifjörður þar af leiðandi samtengdur.“
Samgönguáætlun miðar við að göng undir Fjarðarheiði til Seyðisfjarðar verði næst. En vill bæjarstjórinn að önnur göng verði á undan?
„Ég vil bara byrja á þessu öllu samtímis,“ svarar Jón Björn og vitnar til frétta frá Færeyjum.
„Ég held að Færeyingar séu að byrja á þriðju göngunum núna nokkurn veginn samhliða. Þetta er svolítið sérstakt að við Íslendingar getum ekki náð þeirri viðspyrnu.
Við getum byrjað á fleiri en einum. Því ekki ætla ég að gera lítið úr samgöngum annarra landshluta líka. Það vantar göng víða.
Eigum við ekki að taka Færeyinga á þetta og starta bara nokkrum í einu? Og þessvegna á nokkrum stöðum á landinu?“ spyr bæjarstjóri Fjarðabyggðar.
Og Mjófirðingurinn Sigfús Vilhjálmsson á Brekku rifjar upp að á eynni Kalsoy, sem gárungarnir kalla blokkflautuna vegna fimm jarðganga, hafi Færeyingar meira að segja grafið smalagöng inn í dal einn.
„Þeir gerðu þetta fyrir smalana! En við getum ekki borað á milli fjarða! Skrýtið,“ segir Sigfús.
Hér má sjá frétt Stöðvar 2:
