Innlent

Ó­þægi­legt að fá skjálfta­hrinu rétt fyrir jól

Óttar Kolbeinsson Proppé skrifar
Fannar Jónasson, bæjarstjóri í Grindavík.
Fannar Jónasson, bæjarstjóri í Grindavík. vísir/egill

Grind­víkingar taka skjálfta­hrinunni sem nú gengur yfir á Reykja­nesinu með ró og reyna að halda sinni rútínu fyrir há­tíðirnar. Hún vekur þó upp ó­þægi­legar minningar frá stóru hrinunni í byrjun árs og vöknuðu margir upp við vondan draum í nótt að sögn bæjar­stjórans.

„Það var auð­vitað ó­þægi­legt að vera að fá svona jarð­skjálfta­hrinu aftur núna eftir að þetta hafði legið niðri legni vel. Þannig að menn vöknuðu margir upp við vondan draum í nótt þar sem var farið að skjálfa og fannst greini­lega fyrir þessum skjálftum,“ segir Fannar Jónas­son bæjar­stjóri.

Og skjálftarnir halda á­fram og hafa farið stækkandi með deginum. Sá stærsti í hrinunni mældist 4,9 nú rétt fyrir klukkan hálf tíu í morgun. Rétt fyrir hann varð annar stór skjálfti sem mældist 4,1.

Óvissustig á svæðinu

Þessir skjálftar finnast mjög vel í Grinda­vík sem er sá bær sem liggur næst upp­tökum skjálftanna. Þeir eru á svipuðu svæði og skjálfta­hrinurnar sem urður í byrjun árs fyrir gos. Al­manna­varnir hafa nú lýst yfir ó­vissu­stigi á svæðinu.

Skjálftarnir hafa þó ekki verið af þeirri stærð að hlutir fari að falla úr hillum í Grinda­vík.

„Nei, ekki höfum við orðið vör við það hérna. Ég er hérna á bæjar­skrif­stofunni og það er ekkert sem að hreyfist úr stað hérna hjá okkur og ég hef ekki heyrt að það hafi gerst í bænum. Þetta var náttúru­lega á­berandi skjálfti þannig við finnum fyrir honum en það hafa ekki hreyfst til munir eða fallið úr hillum svo ég viti til,“ segir Fannar.

Halda sinni rútínu

Bæjar­búar reyna að láta þetta ekki hafa á­hrif á sig rétt fyrir jól en Fannar neitar því ekki að það sé auð­vitað leiðin­legt að fá þessa hrinu núna, rétt eftir að fréttir af gos­lokum fóru að berast.

„Jú, jú það er ekki því að neita, þetta er ó­þægi­legt. Og vekur upp minningar um skjálfta­hrinuna sem var í janúar og febrúar og að­draganda gossins þá. En við kunnum ekkert að lesa í þetta og reynum bara að fylgjast með því sem vísinda­menn eru að greina í þessari stöðu,“ segir hann.

„Við höldum bara okkar rútínu held ég. Og fólk reynir að taka þessu bara með ró. En svona, þetta hefði mátt missa sín.“

Nú bíði allir ró­legir og taki því sem koma skal. Við­bragðs­aðilar eru þá til­búnir á svæðinu ef gos hefst eða stærri skjálftar verða.

Er þetta að verða nýja normið hjá ykkur í Grinda­vík?

„Vonandi ekki. En við vitum svo sem ekkert um þetta og tökum því sem höndum ber. En þetta er ó­neitan­lega ó­þægi­legt að þetta skuli vera að vakna aftur upp frá værum svefni en svo vitum við ekkert nema þetta sé bara að fjara út núna og sé bara tíma­bundið. Það verður bara að koma í ljós.“


Tengdar fréttir

Óvissustig vegna skjálftanna við Fagradalsfjall

Ríkislögreglustjóri í samráði við lögreglustjórann á Suðurnesjum lýsir yfir óvissustigi almannavarna vegna jarðskjálftahrinu við Fagradalsfjall. Hrinan hófst í gær og stendur enn yfir.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.