Hjónin Einar Gíslason og Beverly Gíslason beittu börn sem dvöldu hjá þeim á Hjalteyri á áttunda áratug síðustu aldar gríðarlegu ofbeldi.
Aldrei rannsökuð þrátt fyrir fjölda ábendinga
Þetta kemur fram í frásögnum fólks sem dvaldi þar sem börn og hefur stigið fram í fjölmiðlum síðustu vikur. Fram hefur komið að þrátt fyrir að Félagsmálayfirvöld á Akureyri hafi gert alvarlegar athugasemdir við störf hjónanna 1977, óskað hafi verið eftir að ferill þeirra yrði rannsakaður á árunum 2008-2009, þau hafi verið kærð til lögreglu og kvartað yfir þeim í fjölmiðlum 2012 og forsætisráðuneytið fengið kvartanir vegna tveggja barna árið 2012, voru þau aldrei rannsökuð.
Einar lést 2015 og Beverly 2019.
Önnuðust á annað hundrað börn
Hjónin önnuðust börn í Garðabæ í 17 ár eða frá 1998 til 2015. Þau voru lengst af dagforeldrar en ráku Montessori-leikskóla frá 2006-2008.
Fréttastofa hefur óskað eftir upplýsingum frá Garðabæ um hversu mörg börn hjónin hafi annast í sveitarfélaginu. Bærinn hefur aðeins svarað varðandi Montessori- leikskólann sem hjónin ráku en í svörum kemur fram að þau hafi annast 14 börn árið 2006 og verið komin með 22 börn 2007. Þau ráku leikskólann til júlí 2008.
Samkvæmt upplýsingu frá bænum mátti hvert dagforeldri vera með 5 börn á sínum snærum á þeim tíma sem hjónin voru það. Það er því gróflega hægt að áætla að hjónin hafi allt í allt að minnsta kosti verið með um hundrað og sjötíu börn á sínum snærum í Garðabæ þann tíma sem þau störfuðu þar.
Fréttastofa hefur óskað eftir upplýsingum um hvort einhver hafi á árunum 1998-2015 gert athugasemd við störf hjónanna hjá bænum og fengið eftirfarandi svör:
Höfum ekki fengið neinar kvartanir vegna starfa þeirra í Garðabæ svo vitað sé.
Garðabær hefur fengið utanaðkomandi aðila, EAÞ ráðgjöf, til að gera úttekt á starfsemi sem fram fór innan leikskóla og í daggæslu sem umrædd hjón störfuðu við. Fólk sem komst í snertingu við hjónin er hvatt til að hafa samband.
Tíu haft samband
Tíu manns hafa haft samband við sveitarfélagið eftir að málið kom upp. Garðabær hefur ekki gefið upp hvort eitthvað af málunum sé vegna gruns um ofbeldi af hálfu hjónanna.