Fótbolti

Nýi harðstjórinn af Nývangi: Reglur Xavi leka út

Óskar Ófeigur Jónsson skrifar
Xavi Hernandez veifar þegar hann var kynntur sem nýr þjálfari Barcelona liðsins.
Xavi Hernandez veifar þegar hann var kynntur sem nýr þjálfari Barcelona liðsins. AP/Joan Monfort

Xavi Hernandez hefur snúið aftur til Barcelona og er tekinn við sem þjálfari liðsins á miklu ólgutímum. Hann var fljótur að setja sitt mark á liðið með því að setja harðar reglur fyrir leikmenn sína.

Spænska blaðið AS hefur komist yfir þessar nýju reglur leikmanna og starfsmanna Barcelona. Það verður ekkert agaleysi eða önnur vitleysa leyfð í hans þjálfaratíð.

Hinn 41 árs gamli Xavi átti sjálfur magnaðan feril hjá Barcelona og þekkir öll innviði félagsins mjög vel. Það þarf mikið til að koma liðinu aftur þangað sem það var á hans tíma en alls vann Xavi 25 titla með Barcelona þar af spænsku deildina átta sinnum og Meistaradeildina fjórum sinnum.

Pep Guardiola og Luis Enrique náðu báðir frábærum árangri með Barcelona liðið en síðan hefur gengi liðsins legið niður á við. Það hefur síðan allt gengið á afturfótunum síðan að Lionel Messi fór. Það endað með að Ronald Koeman var rekinn.

Xavi lítur augljóslega á sem svo að agamálin séu hluti vandans og að leikmenn þurfi að einbeita sér betur af því að standa sig vel á æfingum liðsins.

Reglur Xavi eru sagðar vera tíu talsins og það kostar sitt að brjóta þær. Ef þú lærir ekki af reynslunni þá tvöfaldast sektin þín næst. Það er ljóst að með þessu minnkar frelsi leikmanna Barcelona talsvert.

Það má sjá að þema þeirra er að koma vel fyrir alls staðar og þar á meðal á samfélagsmiðlum eins og sjá má í reglu níu. Reglurnar tíu eru hér fyrir neðan.

  • Tíu reglur Xavi Hernandez hjá Barcelona
  • 1. Leikmenn verða að mæta níutíu mínútum fyrir æfingu
  • 2. Starfsmenn verða að mæta tveimur klukkutímum fyrir æfingu
  • 3. Leikmenn verða að borða saman á æfingasvæðinu
  • 4. Sektargreiðslur snúa aftur
  • 5. Sektargreiðslur tvöfaldast séu brotin endurtekin
  • 6. Leikmenn verða að vera komnir heim til síns á miðnætti tveimur dögum fyrir leik
  • 7. Leikmenn verða að gefa allt sitt á æfingum
  • 8. Það verður fylgst með því sem leikmenn gera utan vallar
  • 9. Áhættusöm hegðun er ekki leyfð lengur
  • 10. Góð ímynd er grundvallaratriði



Fleiri fréttir

Sjá meira


×