Albert: Hann þarf bara að setla það við sjálfan sig

Albert var öryggið uppmálað á vítapunktinum en bæði mörkin hans komu úr vítum. Þetta voru hans fyrstu mörk í keppnisleik fyrir íslenska landsliðið.

„Það var skemmtilegt að spila þennan leik enda er mjög gaman fyrir sóknarmenn að spila svona leiki,“ sagði Albert Guðmundsson í samtali við Henry Birgi Gunnarsson eftir leikinn.

„Þeir liggja frekar neðarlega á vellinum sem gæti orðið erfitt en þetta var bara sókn eftir sókn eftir sókn sem er skemmtilegt,“ sagði Albert en hvernig fannst honum íslenska liðinu ganga að stýra leiknum?

„Bara ágætlega. Það er mikilvægt í svona leikjum að hreyfa boltann hratt á milli kanta og þá koma upp móment sem þeir svindla í vörninni. Þá koma glufur milli varnarmanna eða á köntunum sem við nýttum ágætlega,“ sagði Albert sem var öruggur í vítunum sínum.

„Ég beið bara eftir honum og þegar hann valdi sér horn þá setti ég hann í hornið,“ sagði Albert sem tók eftir því að markvörður Liechtenstein gaf honum fingurinn.

„Gerði hann það? Hann þarf bara að setla það við sjálfan sig,“ sagði Albert en var hann búinn að ákveða seinna vítið?

„Þegar ég hljóp að boltanum þá ákvað ég að setja hann vinstra megin en það var ekkert ákveðið fyrir leik,“ sagði Albert.

„Það var ánægjulegt að sjá marga á vellinum sem gefur okkur extra búst. Umræðan hefur ekki verið alltof jákvæð upp á síðkastið og það hefur okkur því ennþá meira að taka 4-0 sigur með góðan stuðning,“ sagði Albert.