Enn hreyfing á flekanum við Búðar­á

Í tilkynningu frá Almannavarnarnefnd Ríkislögreglustjóra segir að flekinn hafi hreyfst sem nemur rétt rúmum 3,5 sentimetrum frá laugardegi. Engar aðrar hreyfingar hafa mælst í hlíðinni ofan Seyðisfjarðar og ekki heldur á flekanum við Stöðvarlæk, norðan skriðusársins.

Úrkomulaust er nú á Seyðisfirði en gert er ráð fyrir að fari að rigna talsvert upp úr hádegi, en það mun ganga niður í nótt.

Herðubreið verður opin milli klukkan 14 og 16 í dag og alla daga fram yfir helgi á meðan rýming varir. Íbúar í húsum á rýmingarsvæðum eru sérstaklega hvattir til að mæta.

Þeir munu þá fá aðstoð við að fara og huga að húsum sínum hafi þeir hug til þess.

Fulltrúar Rauða krossins, Múlaþings og lögreglu verða í Herðubreið. Öll velkomin. Minnt er á hjálparsíma Rauða krossins í síma 1717.