Víða milt veður í dag

Vésteinn Örn Pétursson skrifar 2. apríl 2021 08:47

Veðrið ætti að vera milt í dag en búast má við meiri vindi á morgun. Vísir/Vilhelm

Það er suðvestanátt og milt veður í kortunum í dag. Vindurinn ætti þó að ná sér vel á strik á Norðurlandi og má búast við snörpum vindstrengjum við fjöll þar. Léttskýjað verður á austanverðu landinu en annars skýjað og úrkomulítið fram á kvöld.

Þetta kemur fram í hugleiðingum veðurfræðings hjá Veðurstofu Íslands.

Á morgun má búast við suðvestan hvassviðri eða stormi, þó hægara verði suðvestanlands. Súld eða rigning en þurrt á Austurlandi. Snýst í norðan tíu til fimmtán metra á sekúndu um kvöldið með snjókomu eða éljum og kólnar hratt.

Á páskadag er búist við stífri norðanátt með éljum og talsverðu frosti norðan heiða. Síðdegis á páskadag er útlit fyrir hvassviðri eða storm austantil á landinu.

Veðurhorfur á landinu næstu daga, samkvæmt Veðurstofunni:

Á sunnudag (páskadagur):

Norðan 15-23 m/s, hvasst austast, en dregur talsvert úr vindi V-lands síðdegis. Éljagangur á N-verðu landinu, en víða léttskýjað sunnan heiða. Frost 4 til 15 stig, mest inn til landsins.

Á mánudag (annar í páskum):

Norðvestan og vestan 8-13 m/s og él, en bjartviðri SA-lands. Frost víða 1 til 8 stig, en frostlaust við SV-ströndina.

Á þriðjudag:

Fremur hæg vestlæg átt og bjart með köflum. Frost víða 0 til 8 stig, en frostlaust á S- og V-landi.

Á miðvikudag:

Útlit fyrir norðaustanhvassviðri með snjókomu víða um land og herðir á frosti.

Á fimmtudag:

Líklega stíf norðanátt með éljum og talsverðu frosti, en björtu veðri S- og V-lands.

Veður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.