Innlent

Telur ó­tíma­bært að opna landa­mærin meira og efast um lita­kóðunar­kerfið

Hallgerður Kolbrún E. Jónsdóttir skrifar
Alma Möller, landlæknir, segist efast um litakóðunarkerfið sem taka á upp á landamærunum 1. maí. 
Alma Möller, landlæknir, segist efast um litakóðunarkerfið sem taka á upp á landamærunum 1. maí.  Vísir/Vilhelm

Landlæknir telur ekki tímabært að opna landamærin meira og segist hún efast um litakóðunarkerfið sem taka á upp á landamærunum 1. maí næstkomandi. Hann segir stöðuna á landamærunum forsendu þess hvernig ástand faraldursins sé innanlands.

„Ég tel að við eigum áfram að viðhafa ítrustu varkárni á landamærunum og það sé kannski ekki tímabært að opna þau,“ sagði Alma Möller, landlæknir í Kastljósi á RÚV í kvöld.

Alma er ekki sú fyrsta sem lýst hefur yfir áhyggjum vegna litakóðunarkerfisins. Þórólfur Guðnason, sóttvarnalæknir, lýsti yfir áhyggjum vegna þess fyrir um tíu dögum síðan. Hann sagði til að mynda mismunandi svæði innan sama lands geta verið merkt mismunandi lit og erfitt gæti því reynst fyrir landamæraverði að vita nákvæmlega hvaðan fólk er að koma.

Hún segir nauðsynlegt að við lærum af reynslunni og hún sýni að góð staða á landamærum sé forsenda þess að staðan innanlands sé góð.

„Þetta er búið að vera mikið lærdómsferli, allt í kring um landamærin og auðvitað koma upp glufur og við reynum að bæta þær. Núna eru það börn. Þau hafa ekki verið skimuð en það breytist frá og með fimmtudeginum,“ segir Alma.

Ekki nógu margir bólusettir hér

Hún segist þeirrar skoðunar að gera eigi allt sem hægt sé til að lágmarka áhættu á að hingað til lands berist smit. Faraldurinn sé í mikilli siglingu víða erlendis og afbrigðin sem gangi nú um breyti stöðunni.

„Síðast en ekki síst þá erum við ekki með nægilega stóran hóp bólusettan hér. Vissulega erum við búin að bólusetja þá elstu en með þetta breska afbrigði þá er fólk á öllum aldri að smitast,“ segir Alma.

„Fólk hefur verið að brjóta sóttkví“

Víða hafa komið upp áhyggjuraddir undanfarið vegna gruns um að ferðamenn sem koma hingað til lands fari ekki í sóttkví eins og reglur segja til um. Áhyggjur hafa meðal annars verið uppi um að ferðamenn sem lendi á Keflavíkurflugvelli fari beint að gosstöðvunum í Geldingadölum.

„Það er fólk sem hefur verið að brjóta sóttkví. Það er tekið á því með því að taka í notkun þessi sóttkvíarhús, og síðan eru það vottorðin. Við vitum að bóluefnin vernda gegn sjúkdómi en við vitum ekki hvort fólk geti áfram borið smit og líka hvort það geti smitast af nýjum afbrigðum þannig að það er spurning með bólusetningarvottorðin,“ segir Alma.

Hefur efasemdir um litakóðunarkerfið eins og staðan er núna

Litakóðunarkerfið sem tekið verður í gildi 1. maí virkar þannig að misstrangar reglur verða í gildi um komufarþega eftir því hver staðan á faraldrinum er í landinu sem þeir koma frá. Munu farþegar frá löndum þar sem smit eru fá því geta sloppið við sóttkví.

Alma segist hafa efasemdir um kerfið eins og staðan er núna. Það gæti þó virkað vel síðar meir þegar búið er að tryggja útbreiddara ónæmi gegn veirunni hér á landi og faraldurinn farinn að dvína.

„Ég held að það kunni að vera of snemmt að hætta að skima og ég held að það verði erfitt að kóða sum lönd utan Evrópu þar sem er minna skimað og minna um upplýsingar,“ segir Alma.


Tengdar fréttir

„Far­þegum er bara blandað saman“

Íslendingur sem ferðaðist hingað til lands frá Kaupmannahöfn um helgina segir farir sínar ekki sléttar eftir flug með Icelandair frá til Keflavíkur nú um helgina. Vélin kom til Kaupmannahafnar hálffull af farþegum frá Stokkhólmi.

Segir litakóðakerfið klaufaleg mistök

Kára Stefánssyni, forstjóra Íslenskrar erfðagreiningar, líst illa á áætlanir stjórnvalda um að taka upp litakóðakerfi á landamærunum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×