Kona grunuð um að þræla þremur stjúpbörnum sínum út

Atli Ísleifsson skrifar 19. mars 2021 11:33

Landsréttur felldi gæsluvarðhaldsúrskurð Héraðsdóms Reykjaness yfir konunni úr gildi. Vísir/Vilhelm

Landsréttur hefur fellt úr gildi gæsluvarðhaldsúrskurð héraðsdóms yfir konu sem grunuð er um fjárdrátt, að hafa þrælað út þremur stjúpbörnum sínum og beitt þau andlegu ofbeldi. Konan var handtekin fyrr í vikunni og úrskurðaði Héraðsdómur Reykjaness konuna í kjölfarið í gæsluvarðhald til 24. mars.

Í úrskurði héraðsdóms kemur fram að Barnaverndarnefnd hafi kært konuna vegna upplýsinga um að konan hafi látið börnin vinna myrkranna á milli í nokkur ár, notið fjárhagslegs ávinnings af meintum brotum, sjálf tekið laun þeirra og ýmist sent peninga úr landi eða þá notað í spilakössum. Rannsókn lögreglu á bankareikningum konunnar og barnanna er sögð styðja eindregið frásögn barnanna.

Í dómi Héraðsdóms Reykjaness segir að rannsókn málsins sé á viðkvæmu stigi og sé ljóst að hún sé umfangsmikil. Var þar fallist á með sóknaraðila að hætta væri á að konan myndi reyna að torvelda rannsókn málsins, svo sem með því að eyða gögnum, skjóta undan munum og hafa áhrif á mikilvæg vitni, sér í lagi brotaþola sem eru stjúpbörn hennar og því í sérstaklega viðkvæmri stöðu.

Landsréttur úrskurðar hins vegar að að virtum gögnum málsins séu ekki fyrir hendi rannsóknarhagsmunir til að konunni verði gert að sæta gæsluvarðhaldi. Var því ákveðið að fella gæsluvarðhaldsúrskurðinn úr gildi.

Konan var handtekin á þriðjudag og yfirheyrð í kjölfarið. Við húsleit á heimili og vinnustað konunnar fundust meðal annars 835 þúsund krónur í reiðufé, að því er segir í úrskurði héraðsdóms.

Dómsmál Ofbeldi gegn börnum Barnavernd

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir