Erlent

Þrettán fórust í árekstri jeppa og vöruflutningabíls

Kjartan Kjartansson skrifar
Lögreglumenn á vettvangi slyssins í dag. Malarflutningabíl var ekið inn í jeppa með 25 manns um borð.
Lögreglumenn á vettvangi slyssins í dag. Malarflutningabíl var ekið inn í jeppa með 25 manns um borð. AP/Gregory Bull

Þrettán manns eru látnir eftir harðan árekstur jeppa og vöruflutningabíls á hraðbraut í sunnanverðri Kaliforníu í Bandaríkjunum í dag. Talið er að 25 manns hafi verið um borð í jeppanum.

Slysið átti sér stað á hraðbraut sem liggur um landbúnaðarhérað um 160 kílómetrum austur af San Diego, um átján kílómetrum norður af landamærunum að Mexíkó. Lögreglustjóri á svæðinu segir við AP-fréttastofuna að tólf manns hafi verið úrskurðaðir látnir á vettvangi og sá þrettándi á sjúkrahúsinu.

Upphaflega greindu talsmenn sjúkrahússins í El Centro þangað sem flestir þeirra slösuðu voru fluttir frá því að fimmtán væru látnir. AP-fréttastofan uppfærði frétt sína í kjölfarið og sagði þrettán látna.

Fjöldi annarra farþega í bílnum slasaðist í árekstrinum og var fluttur á sjúkrahús. Ekki liggur fyrir hvað olli slysinu en óvenjumargir farþegar voru í jeppanum. Jeppinn var af gerðinni Ford Expedition og tekur átta manns. AP segir að malarflutningabílnum hafi verið ekið inn í jeppann.

Landamæraverðir aðstoða nú lögreglu við rannsókn á slysinu. Ekki er vitað hvort að fólkið í jeppanum hafi verið með landvistarleyfi í Bandaríkjunum. Marcario Mora, talsmaður Tolla- og landamæraeftirlits í Yuma og El Centro, segir að mögulega hafi verið um farandverkamenn að ræða.

Uppskerutímabil stendur nú yfir á káli og fleiri jurtum á svæðinu þar sem slysið varð. Bændur í sunnanverðri Kaliforníu reiða sig mjög á erlenda farandverkamenn.

Frá Imperial-sýslu í sunnanverðri Kaliforníu þar sem slysið varð. Sýslan er landbúnaðarsvæði og er talið mögulegt að fólkið í jeppanum hafi verið farandverkamenn.Vísir/Getty

Fréttin hefur verið uppfærð.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.