Ummerki eftir skotvopn á heimili meints byssumanns

Átta karlmenn sæta nú gæsluvarðhaldi í tengslum við rannsókn lögreglu á morðinu í Rauðagerði. Mennirnir eru á fertugs- og fimmtugsaldri og koma frá Íslandi, Litháen, Albaníu og Spáni en heimildir fréttastofu herma að allir haldi staðfastlega fram sakleysi sínu.

Gæsluvarðhald yfir litháískum karlmanni var í dag framlengt til miðvikudagsins 24. febrúar en gæsluvarðhald yfir öðrum sakborningum gildir einnig fram á miðja næstu viku. Sá maður hafði aðeins verið hér á landi í örfáar vikur þegar hann var handtekinn og er sagður hafa komið hingað eftir að hafa verið ráðinn til starfa fyrir Íslendinginn sem er í haldi lögreglu.

Rannsóknin er gríðarlega umfangsmikil og hefur lögregla haldlagt að minnsta kosti þrjú ökutæki, farið í húsleit á ríflega tuttugu stöðum, og kallað eftir farsímagögnum út frá símamöstrum til þess að tengja aðila saman, svo fátt eitt sé nefnt, en nær allt embætti lögreglunnar á höfuðborgarsvæðinu kemur að rannsókninni með einum eða öðrum hætti.

Heimildir fréttastofu herma að lögregla telji sig nú þegar hafa haft hendur í hári meints byssumanns eftir að hafa farið í húsleit á heimili hans í fyrradag, þar sem ummerki eftir skotfæri úr sams konar byssu og notuð var á laugardagskvöld, fundust. Vopnið er hins vegar enn ófundið en rannsókn stendur yfir á skothylkjum og byssukúlum sem fundust á vettvangi.