Tillaga um orkuskipti í flugi samþykkt á Alþingi

Sunna Sæmundsdóttir skrifar 3. febrúar 2021 14:08

Rafmagnsvél frá sænska fyrirtækinu Heart Aerospace. Stefnt er að því að þessi 19 sæta vél verði farin að fljúga með farþega eftir örfá ár. MYND/HEART AEROSPACE.

Þingsályktunartillaga umhverfis- og samgöngunefndar um orkuskipti í flugi var samþykkt samhljóða með atkvæðum 53 viðstaddra þingmanna á Alþingi í dag.

Samkvæmt henni verður þremur ráðherrum falið að setja á fót starfshóp sem á að vinna stefnu og aðgerðaráætlun um orkuskipti í flugi á Íslandi, eða samgöngu- og sveitarstjórnarráðherra, ferðamála-, iðnaðar- og nýsköpunarráðherra og umhverfis- og auðlindaráðherra.

Samkvæmt tillögunni er markmiðið að byrjað verði að nota umhverfisvæna orkugjafa í innanlandsflugi innan tíu ára.

Í umræðum á Alþingi í gær kom fram að gert sé ráð fyrir að litlar rafmagnsflugvélar verði komnar á markað árið 2022. „Það er á næsta ári og því er raunhæft að áætla og hvetja til þess að þróun í átt að notkun umhverfisvænna orkugjafa í innanlandsflugi verði hafin árið 2030 þannig að mögulegt verði að knýja allan flugflotann sem starfræktur verður í innanlandsflugi á komandi árum á umhverfisvænum orkugjöfum,“ sagði Jón Gunnarsson, þingmaður Sjálfstæðisflokks og varaformaður umhverfis- og samgöngunefndar, þegar hann mælti fyrir tillögunni í gær.

Alþingi Fréttir af flugi Umhverfismál

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.