Innlent

Sakaður um gróft heimilisofbeldi og má fylgjast með vitnaleiðslu

Samúel Karl Ólason skrifar
Sálfræðingur segir konuna hafa lifað í ótta við manninn og að henni hafi staðið mikil ógn af honum. Því væri henni þungbært að gefa skýrslu með hann í salnum.
Sálfræðingur segir konuna hafa lifað í ótta við manninn og að henni hafi staðið mikil ógn af honum. Því væri henni þungbært að gefa skýrslu með hann í salnum. Vísir/Getty

Dómarar við Landsrétt segja að ekki sé hægt að vísa manni úr réttarsal á meðan kona sem hann hefur verið ákærður fyrir að beita grófu heimilisofbeldi gefur skýrslu í aðalmeðferð málsins. Með því felldu þeir úrskurð Héraðsdóms Reykjaness þar að lútandi niður.

Meðal ástæðna sem dómararnir gefa er að konan hefur átt í samskiptum við manninn og búið með honum, eftir að meint heimilisofbeldi átti sér stað.

Úrskurði héraðsdóms var áfrýjað til Landsréttar í síðasta mánuði og úrskurðurinn gefinn þann 29. desember.

Í lögum segir að dómari geti farið eftir kröfu ákæranda eða vitnis og vísað þeim sem er ákærður úr sal á meðan vitni gefur skýrslu, ef dómari telji að vera viðkomandi í salnum sé íþyngjandi fyrir vitnið og hafi áhrif á framburð þess. Samkvæmt niðurstöðu Landsréttar hefur Hæstiréttur slegið því föstu að túlka eigi þröngt undantekningar frá meginreglunni um rétt þeirra sem hafa verið ákærðir til að vera viðstaddir aðalmeðferð.

Í þessu tiltekna máli er manninum gert að hafa beitt konuna miklu ofbeldi frá október 2015 til júní 2017.

Manninum er meðal annars gert að hafa brotið bein í konunni, slegið og sparkað í hana og ógnað lífi hennar, heilsu og velferð. Í eitt sinn sló hann til hennar með hamri. Í annað skipti er hann sagður hafa lyft henni í höfuðhæð og skellt henni í gólfið, bitið hana og kýlt.

Yfir eitt þriggja daga tímabil er hann sagður hafa svipt konuna frelsi sínu og ítrekað beitt hana líkamlegu og andlegu ofbeldi.

Sálfræðingur segir hana hafa lifað í ótta við manninn og að henni hafi staðið mikil ógn af honum. Því væri henni þungbært að gefa skýrslu með hann í salnum.

Í niðurstöðu Landsréttar segir að taka verði tillit til þess að konan og maðurinn hafi búið saman í nokkra mánuði á árunum 2018 og 2019 og hún hafi þar að auki haft frumkvæði að því að hafa samband við hann um mitt síðasta ár.

Því sé ekki tilefni til að víkja manninum úr sal á meðan hún gefur skýrslu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.