Innlent

Sex ára drengur hryggbrotnaði eftir fall úr leikkastala

Vésteinn Örn Pétursson skrifar
Sonur Hrannar datt aftur fyrir sig úr efri turni kastalans og niður á neðri þríhyrninginn sem sjá má á myndinni.
Sonur Hrannar datt aftur fyrir sig úr efri turni kastalans og niður á neðri þríhyrninginn sem sjá má á myndinni. Facebook

Hrönn Óskarsdóttir, móðir sex ára drengs sem brotnaði á hryggjarlið þegar hann féll úr kastala á skólalóð Snælandsskóla, segist hafa talið leiktæki á skólalóðum öruggari en raun ber vitni. Leiktækið sem um ræðir væri líklega óleyfilegt samkvæmt evrópskum stöðlum ef það væri ekki selt í einu lagi.

Í færslu á Facebook-síðu sinni lýsir Hrönn því þegar hún fékk símtal eftir að sonur hennar datt aftur fyrir sig úr leikkastalanum á skólalóðinni í byrjun nóvember. Hann hafi ekki getað hreyft fæturna og sjúkrabíll kallaður út.

„Þvílíkt áfall! Hryggjaliður brotinn en hann fékk til allrar hamingju máttinn aftur í lappirnar og hleypur um í dag og vonandi jafnar hann sig að fullu,“ skrifar Hrönn. Í samtali við Vísi bætir hún því við að læknar geri ráð fyrir að hann nái fullum bata, en tíminn komi þó til með að leiða það endanlega í ljós.

Hún segir að sér hafi verið brugðið þegar hún fór og skoðaði kastalann sem sonur hennar datt úr. Fallhæðin úr honum hafi verið þrír metrar frá jörðu, sem samkvæmt stöðlum sé leyfilegt ef undirlagið er gúmmímotta.

Eitt tæki en ekki tvö og er þess vegna leyfilegt

Patrik sonur hennar datt hins vegar ekki á jörðina, heldur á annan hluta leiktækisins, þríhyrning sem stendur út úr öðru mannvirki. Á þríhyrningnum er að finna klifurgrip, líkt og á klifurveggjum. Patrik lenti með bakið á einu slíku gripi og brotnaði þess vegna í baki.

„Samkvæmt stöðlum er mjög strangt að það þarf að vera ákveðin fjarlægð á milli leiktækja svo börn geti ekki dottið af einu leiktæki á annað. Við höfum því verið að reyna að fá þetta tæki dæmt ólöglegt til að koma í veg fyrir að önnur börn slasi sig í svona leiktæki. Í dag kom niðurstaða, þessar reglur um fallfjarlægð á milli leiktækja gilda ekki ef um sama leiktæki er að ræða. Börn mega semsagt detta og slasa sig lífshættulega í sama leiktækinu en ekki tveimur aðskildum,“ skrifar Hrönn.

Hún hvetur foreldra þá til þess að skoða leiktækin í sínu nærumhverfi, þar sem hún viti að víða séu leiktæki sambærileg því sem sonur hennar féll úr.

Hrönn segir að leiktækið væri að öllum líkindum ekki leyfilegt, nema af því það er selt í einu lagi.Facebook

Slysagildra keypt inn í góðri trú

Í samtali við Vísi segist Hrönn telja að bæjarfélög og skólastjórnendur kaupi og láti setja leiktækin upp í góðri trú. Hins vegar sýni málið að leiktækin geti verið verulega hættuleg, þrátt fyrir að uppfylla alla staðla.

„Þetta er klárlega mikil slysagildra, þessi kastali. Í fyrsta lagi virðast leiktæki flest vera tekin út á sumrin og vorin, en flestir krakkar leika í leiktækjunum þegar þau eru blaut og frosin. Þannig að undirlagið undir þessum kastala, sem er örugglega eins og á mörgum öðrum stöðum, það er ekki í lagi. Þar er gervigras sem frýs, þannig það er ekki að veita þá fallvörn sem það á að veita,“ segir Hrönn.

Hún segir að fallpróf hafi verið gert á tækinu í kjölfar slyssins. Það hafi leitt í ljós að undirlagið væri hart í frosti, þar sem vatn kæmist undir gervigrasið. Vatnið frysi og gerði undirlagið grjóthart. Kastalinn sé því allt of hár miðað við þá fallvörn sem undirlagið veitir í frosti.

Rauða merkingin á myndinni sýnir hvaðan drengurinn datt á neðri þríhyrning lægri turnsins.Facebook

„Okkar að láta orðið berast“

Eins og áður kom fram er um eitt og sama tækið að ræða, það er að segja allar einingar þess eru seldar saman. Hrönn bendir á að ef mannvirkin tvö sem sonur hennar datt á milli væru seld sem tvö mismunandi tæki teldust þau standa of nálægt hvort öðru, þar sem staðlar gera ráð fyrir að ekki eigi að vera hægt að detta úr einu leiktæki á annað.

„Það sem kemur úr þessum úrskurði frá einhverju staðlaráði í Evrópu er að það væri engin reglugerð sem bannar það að þú dettir á sama leiktækið.“

Vegna þeirrar niðurstöðu er ekki hægt að gera framleiðanda tækisins að kalla það inn og láta kaupendur vita af hættunni sem því fylgir.

„En núna er það bara okkar að láta orðið berast. Að leiktæki á Íslandi eru kannski ekki jafn örugg og við höfum haldið hingað til,“ segir Hrönn.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.