Hátt í hundrað þúsund slösuðust á trampólíni

Það ætti að letja börn til þess að nota trampólín, segja læknar í Bandaríkjunum. Slík tæki séu einfaldlega of hættuleg. Samtök barnalækna í Bandaríkjunum telja að um 98 þúsund manns slasist á hverju ári þar í landi af völdum trampólína og mörg þeirra séu börn.



Fréttastofa BBC segir að sérfræðingar í öryggismálum telji að vinsældir trampólína séu að aukast og slys af völdum þeirra því að aukast að sama skapi.

Dr Michele LaBotz, sem hefur unnið skýrslu um málið á vegum bandarískra barnalækna, segir að fólk verði að hafa í huga að mörg slys verði á sjálfum dýnunum og gögn bendi til þess að öryggisnet bjargi ekki miklu.

Þá benda gögn til þess að flest slys verði þegar fleiri en einn er á trampólíninu í einu. Börn undir fimm ára aldri eru líklegust til að slasa sig mest, en þau eru gjörn á að rispa sig eða fara úr lið. Meiðslin geta aftur á móti orðið mun alvarlegri og jafnvel verið banvæn.