Milljónasti farþeginn

„Við erum að fljúga til London Gatwick flugvallar og erum á leiðinni til Brighton að versla inn jólagjafirnar og njóta þess að ganga um bæinn. Við erum búin að vera saman í sjö ár og höfum aldrei komist í frí saman áður, svo það má segja að þetta sé stór stund hjá okkur,“ sagði Gunnhildur Blöndal sem var milljónasti farþegi flugfélagsins WOW air. Hún var á leið úr landi í gær ásamt manni sínum Björgvini Viktori Þórðarsyni. Hún fékk af þessu tilefni gjafabréf fyrir tvo úr hendi Skúla Mogensen, stofnanda og forstjóra WOW air, og kvaðst ætla að skella sér með Björgvini til Dyflinnar næsta sumar. „Ég er mjög stoltur af því að í dag skulum við fljúga með milljónasta gestinn okkar og afar þakklátur fyrir þær móttökur sem við höfum fengið bæði hér innanlands og erlendis frá fyrsta degi,“ sagði Skúli. „Það er magnað að hafa flogið með þrefaldan fjölda íslensku þjóðarinnar frá fyrsta flugi okkar fyrir tveimur og hálfu ári. Fyrsta árið flugu um 110 þúsund farþegar með WOW air og árið 2013 um 415 þúsund.“ -gun