Vill að kröfuhafar bankanna taki við rekstri þeirra

Sigmundur Davíð Gunnlaugsson sagði á Alþingi í dag að hann teldi best að kröfuhafar bankanna, sem í raun eiga bankanna, taki við rekstri þeirra. Þetta sagði hann eftir fyrirspurn frá nafna sínum Erni Rúnarssyni í fyrirspurnartíma. Sigmundur Ernir spurði formann Framsóknarflokksins hvaða lærdóm hann hefði af einkavæðingu bankanna og hvernig hann sæi fyrir sér eignarhald á nýju ríkisbönkunum.

„Ég þakka góða fyrirspurn og er afar þakklátur því að háttvirtur þingmaður telji mig hæfastan til þess að svara þessari spurningu," sagði Sigmundur Davíð.

Hann sagði að lærdómurinn af einkavæðingu bankanna væri sá að það sé ekki æskilegt að hafa einn stóran kjölfestufjárfestir. Farsælla væri að hafa dreiðari eignaraðild enda myndi það skila sem mestu til samfélagsins.

Varðandi eignarhaldið í framtíðinni sagði Sigmundur Davíð að æskilegast væri að koma þeim í hendur kröfuhafanna.