Ólafur Ingi á leið til Tyrklands

Miðjumaðurinn Ólafur Ingi Skúlason er á leið til Gençlerbirli í Tyrklandi. Samkvæmt heimildum Fréttablaðsins skrifar Ólafur væntanlega undir samning við tyrkneska úrvalsdeildarliðið í dag.

Ólafur, sem er uppalinn Fylkismaður, kemur frá belgíska liðinu Zulte Waregem þar sem hann lék um fjögurra ára skeið. Þar áður var hann hjá SönderjyskE í Danmörku en hann hefur einnig leikið með Helsingborg í Svíþjóð og Brentford á Englandi, auk þess sem hann var á mála hjá enska úrvalsdeildarliðinu Arsenal 2001-05.

Ólafur, sem er 32 ára gamall, verður annar Íslendingurinn til að spila með Gençlerbirli en Atli Eðvaldsson, fyrrverandi landsliðsfyrirliði og -þjálfari, lék með liðinu 1989-90. Hjá Gençlerbirli, sem er staðsett í Ankara, höfuðborg Tyrklands, hittir Ólafur fyrir Stuart Baxter, fyrrverandi þjálfara sinn hjá Helsingborg