Breska fótboltalandsliðinu tókst ekki að vinna Senegal

Bretar byrja fótboltakeppni Ólympíuleikanna ekki nógu vel því breska liðið náði bara 1-1 jafntefli á móti Senegal á Old Trafford í Manchester. Leikur Breta var allt annað en sannfærandi á móti frísku og baráttuglöðu liði Senegala en Afríkumennirnir létu vel finna fyrir sér í leiknum.

Craig Bellamy kom Bretlandi í 1-0 á 20. mínútu en þetta var fyrsta mark Breta síðan 1960. Bellamy afgreiddi boltann vel í teignum eftir að Steven Caulker skallaði til hans aukaspyrnu Ryan Giggs.

Moussa Konaté jafnaði metin á 82. mínútu þegar rangstöðuvörn Breta brást og Konaté, sem leikur með Maccabi Tel Aviv í Ísrael, lyfti boltanum skemmtilega yfir markvörðinn Jack Butland.

Bretar og Senegalar eru einnig með Úrúgvæ og Sameinuðu arabísku furstadæmunum í riðli en Úrúgvæ er á toppi riðilsins eftir 2-1 sigur fyrr í dag.