Guðmundur: Sakna þessara stiga sem við töpuðum í kvöld

„Þetta var hörkuleikur og tvö frábær fótboltalið að keppa. Það var gaman að fá að taka þátt í þessu við þessar flottu aðstæður," sagði markaskorarinn Guðmundur Steinarsson, leikmaður Keflavík, eftir jafntefli gegn FH-ingum í kvöld. Heimamenn vígðu nýja völlinn sinn og geta nú loks farið að spila á sínum eigin heimavelli. Guðmundur segir stórkostlegt að vera kominn aftur á þeirra rétta heimavöll. „Ég er sáttur við öll stig en á heimavelli vill ég alltaf fá öll stigin og ég sakna þessara stiga sem við töpuðum í kvöld. En það er stórkostlegt að vera komnir aftur hingað því það finnst öllum betra að vera hér, meira að segja áhorfendum líka enda komast helmingi fleiri að hér en út í Njarðvík," sagði Guðmundur en Keflvíkingur spiluðu heimaleiki sína þar fram að leiknum í kvöld. „Bæði lið vildu sigra en það tókst ekki og FH-ingarnir verða að fara rífa sig upp ef þeir ætla að taka þátt í toppbaráttunni en við ætlum okkur klárlega vera það. En svona heilt yfir þá held ég menn geti sætt sig við stigið úr þessum leik," sagði Guðmundur að lokum.