Stjórnin getur vel við unað

Ríkisstjórnin getur vel við unað að halda meirihluta kjósenda að baki sér, eins og fram kemur í skoðanakönnun Fréttablaðsins, segir Gunnar Helgi Kristinsson, prófessor í stjórnmálafræði við Háskóla Íslands.

Eins og fram kom í Fréttablaðinu í gær njóta stjórnarflokkarnir stuðnings rúmlega 53 prósenta kjósenda og myndu samanlagt halda óbreyttum meirihluta þingmanna yrðu niðurstöður kosninga í takt við könnun blaðsins.

Gunnar Helgi segir að aðstandendur ríkisstjórnarinnar hljóti að vera ánægðir með þessa niðurstöðu. Þau mál sem stjórnin hafi unnið í undanfarið, niðurskurður, skattahækkanir og Icesave, séu fráleitt fallin til vinsælda.

Á hinn bóginn hljóta niðurstöðurnar að vera stjórnarandstöðuflokkunum nokkurt áhyggjuefni, segir Gunnar Helgi. Þeir komist ekkert áleiðis þrátt fyrir óvinsæl mál ríkisstjórnarinnar, og hljóti í framhaldinu að reyna að átta sig á hvað þeir séu að gera vitlaust.

Vinstri græn bæta við sig umtalsverðu fylgi, og mælast með stuðning tæplega fjórðungs kjósenda í könnun Fréttablaðsins. Gunnar Helgi segir erfitt að ráða í það hvað dragi fólk að flokknum. Líklegt megi telja að úr því megi lesa sterka stöðu Steingríms J. Sigfússonar, formanns flokksins.

Ólíklegt má telja að klofningur í flokknum undanfarið trekki að stuðning, enda er sundurlyndi yfirleitt til þess að skaða flokka, segir Gunnar Helgi. - bj