Castró var með SS foringja í þjónustu sinni

Leyniskjöl frá þýsku leyniþjónustunni sem gerð hafa verið opinber sýna að Fidel Castro fyrrum leiðtogi Kúbu naut aðstoðar fyrrum nasistahermanna úr SS sveitunum árið 1962.

Í skjölunum kemur fram að Castro bauð fjórum háttsettum SS foringjum til Havana meðan að Kúbudeilan stóð sem hæst. Castro bauð þeim fjórföld laun þeirra fyrir sérfræðiþekkingu þeirra á sviði hernaðar. Tveir þeirra munu hafa tekið boði Castrós.

Auk þess mun Castró hafa reynt að ráða til sín þýska vísindamenn frá tímum nasistanna en ekki haft árangur sem erfiði.

Í frétt um málið á Fox News segir að tilgangurinn hafi greinilega helgað meðalið í þessu máli hjá Castró en talið er að hann hafi viljað draga úr áhrifum Sovétmanna á Kúbu með þessum mannaráðningum.