600 skólapláss vantar

Fjárveitingu vantar fyrir að minnsta kosti fimm- til sjöhundruð nemendur sem sótt hafa um framhaldsskólanám næsta haust. Formaður félags íslenskra framhaldsskóla segir að vandinn hafi verið fyrirsjáanlegur, en ekkert hafi verið að gert og úr því sem komið er verði hann líkast til leystur með því að troða í skólana. Ingibjörg Guðmundsdóttir, formaður félags íslenskra framhaldsskóla, segir marga samverkandi þætti valda því að úrlausnir vanti fyrir öll þessi ungmenni. Þrengingar séu á vinnumarkaði og margir kjósi að halda áfram námi af þeim sökum, auk þess sem vilji unglinga til að mennta sig sé einfaldlega að aukast. Þá hafi óvenju lítið brottfall átt sér stað úr framhaldsskólum á síðastliðnu ári og því séu fleiri nemendur fyrir í framhaldsskólum en oftast áður. Ingibjörg segist ekki hafa neinar staðfestar tölur en óformlega er talið að þetta séu um 5-700 nemendur, hugsanlega fleiri með eldri nemum sem vilja komast að. Hún telur málið vera á borðum fjármála- og menntamálaráðuneytis. Til að leysa málin þurfi að víkka fjárlagarammann auk þess sem nauðsynlegt sé að huga að skólabyggingum á Reykjavíkursvæðinu. Ingibjörg segir að vissulega hafi ástandið verið fyrirsjáanlegt og að félagið hafi verið búið að biðja um að hugað yrði að því með meiri fyrirvara enda hefði þurft að vera búið að leysa málið núna. Hún segist þó reyna að vera bjartsýn um að málið leysist.