Lilja Al­freðs­dóttir er nýr for­maður Framsóknar­flokksins

Lilja sigraði gegn Ingibjörgu Isaksen, þingflokksformanni Framsóknar. Alls greiddu 606 atkvæði í formannskosningunni. Lilja hlaut 352 atkvæði í kjörinu eða 58% atkvæða og Ingibjörg 254 atkvæði eða 42%. Einn seðill var auður.

Lilja tekur við af Sigurði Inga Jóhannssyni en Framsóknarflokkurinn stendur ekki vel og var með 5,4 prósent í nýjasta Þjóðarpúls Gallup.

Sjá einnig: Fram­sókn þurfi að þora að svara rang­færslum og hálfsannleik popúlista

Vísir var á staðnum í dag og birtir fréttir með viðbrögðum beggja frambjóðenda. Hér fyrir neðan er streymi Framsóknarflokksins frá flokksþinginu.

Í ræðu sinni eftir að úrslit voru ljós þakkaði Lilja traustið, Ingibjörgu fyrir baráttuna sem og Sigurði Inga Jóhannssyni fráfarandi formanni.

„Þetta er nákvæmlega þetta sem flokkurinn okkar þurfti. Með þessu formannskjöri erum við búin að skerpa áherslunar. Við erum að sýna þjóðfélaginu að við erum tilbúin að bretta upp ermar og hefja nýjan framsóknaráratug,“ sagði Lilja einnig í ræðu sinni.

„Það þýðir ekki bara að standa hér og vera rosalega ánægður því það er mikil vinna framundan. Það fyrsta sem við erum að fara að gera er að snúa vörn í sókn á sveitarstjórnarstiginu. Við ætlum að vinna næstu kosningar,“ sagði Lilja en sveitastjórnarkosningar fara fram þann 16. maí næstkomandi.