Suðurnesin eru olnbogabarn ríkisstjórnarinnar

Bjarni Harðarson, þingmaður Framsóknarflokksins, segir Suðurnesin vera olnbogabarn stjórnvalda og gjalda fyrir nálægðina við Reykjavík.

Vegna fjárskorts hefur Heilbrigðisstofnun Suðurnesja ákveðið að frá með 16. júlí verði læknar ekki á vakt eftir klukkan fjögur á daginn.

,,Ekki er tekið mið af því hversu mikið fólki hefur fjölgað á svæðinu. Suðurnes eru olnbogabarn ríkisstjórnarinnar og gjalda fyrir nálægðina við Reykjavík," segir Bjarni.

Bjarni segir alþekkt að ríkisstofnanir telji sig ekki hafa það fjármagn sem þær þurfa. ,,Það var einnig þannig þegar við Framsóknarmenn vorum við stjórnvölinn," segir Bjarni.

,,Það er vítavert að forsvarsmönnum Heilbrigðisstofnunarinnar hafi ítrekað verið lofað af Guðlaugi Þór og heilbrigðisráðuneytinu að leita yrði lausna en ekkert hafi verið gert," segir Bjarni.

Áhugaleysi stjórnvalda á Suðurnesjum er ekki nýtt að mati Bjarna. ,,Þetta er ekki eina dæmið um að Suðurnesin eru olnbogabarn stjórnvalda," segir Bjarni og bendir á fjárhagsvandræði sýslumannsembættisins á svæðinu, úrræðaleysi í málefnum fatlaðra og að ýmsum framkvæmdum í vegamálum hafi verið frestað. Í því samhengi nefnir Bjarni lagningu Suðurstrandavegar sem ætlað er að tengja Suðurkjördæmi saman.