Vél Atlanta nauðlenti í Kenýa

Boeing 747-flugvél flug­félagsins Atlanta, TF-ARJ, hlekktist á í lendingu á flugvelli í Nairobi í Kenýa aðfaranótt sunnudags. ­Áhöfn flugvélarinnar varð vör bilunar í vökvakerfi skömmu ­eftir­ flugtak og ákvað að snúa aftur. Bilunin varð þess valdandi að hluti hjólabúnaðar náðist ekki ­niður sem skyldi og nauðlenti vélin því. Lendingin tókst vel og er sjö manna áhöfn óhult. Skemmdir urðu á hluta hjólabúnaðar flugvélarinnar og lúgu á hjólahúsi. TF-ARJ var hlaðin um 120 tonna farmi af ávöxtum og blómum sem átti að flytja til Maastricht í Hollandi fyrir flugfélagið Cargolux. Þetta kemur fram í fréttatilkynningu frá Cargolux. Í tilkynningu frá flugfélaginu Atlanta segir að vélin sé nú í flugskýli á flugvellinum í Nairobi og beðið sé eftir varahlutum. Flugfélagið gerir ráð fyrir að viðgerð ljúki á næstu dögum. Ekki er talið að atvikið komi til með að hafa áhrif á rekstur flug­félagsins.