Sjónvarpsáhorfendur fá að sjá "meira" af Beckham

Svo gæti farið að hörðustu kvenkynsaðdáendur knattspyrnuhetjunnar David Beckham fái meira fyrir peninginn sinn þegar hann byrjar að spila með LA Galaxy. Öfugt við áð sem tíðkast í Evrópu, fá nefnilega myndatökumenn aðgang að búningsherbergjum leikmanna í Bandaríkjunum. Þar fá sjónvarpsáhorfendur oft að sjá hetjurnar sínar nánast klæðalausar.

Breska blaðið Daily Star vekur athygli á þessu í dag og ræðir þar við tengilið sinn á bandarískri sjónvarpsstöð. "Íþróttamenn í Bandaríkjunum eru vanir því að hafa myndavélarnar og fréttamennina ofan í sér inni í búningsklefum og það er bara eitthvað sem hefur viðgengist. Aðdáendur vilja fá að heyra strax hvað menn hafa að segja um leikinn og því er fjölmiðlamönnum hleypt beint inn í klefa eftir leik.

Þetta þýðir að það kemur oft fyrir að áhorfendur í sjónvarpi sjá kannski eitthvað meira en til stóð á sjónvarpsskjánum og Beckham gæti auðveldlega lent í því. Hann verður að gæta sín á þessu, en ég er viss um að kvenkyns áhorfendur hefðu ekkert á móti því að sjá hann fáklæddan á skjánum," sagði talsmaður Daily Star.

Ekki er víst að kryddpían Victoria verði ánægð með þetta, en eins og fram kom í heimildarmynd hennar sem sýnd var á NBC á dögunum - "Victoria Beckham - Coming to America" - ætlar hún ekki að ráða bónda sínum glæsilega stúlku sem aðstoðarmann. "Hún má ekki vera glæsileg og of grönn - það er mín deild. Ég er fyrst og fremst að leita að atvinnumanni," sagði kryddpían.