Sverrir öflugur í þriðja 1-0 sigri Rostov í röð

Sverrir Ingi Ingason lék allan leikinn í vörn Rostov sem vann 1-0 sigur á Dynamo Moskvu í rússnesku úrvalsdeildinni í kvöld.

Þetta var fjórði leikur Sverris með Rostov en liðið hefur fengið 10 stig úr þessum fjórum leikjum. Rostov hefur unnið síðustu þrjá leiki sína 1-0 og aðeins fengið á sig eitt mark síðan Sverrir kom.

Sverrir átti afar góðan leik í vörn Rostov og var hársbreidd frá því að skora þegar hann átti skot í stöngina á 18. mínútu. Aðeins mínútu síðar skoraði Timofei Kalachev sigurmark Rostov úr vítaspyrnu.

Rostov er komið upp í 3. sæti rússnesku deildarinnar með 10 stig, þremur stigum á eftir Zenit og Lokomotiv Moskvu. Næsti leikur Rostov er gegn Ufa á laugardaginn.

Ragnar Sigurðsson var ekki í leikmannahópi Rubin Kazan sem gerði 1-1 jafntefli við Lokomotiv Moskvu.