Innlent

Sprautan breytir litlu fyrst um sinn á heimili þess fyrsta

Kristín Ólafsdóttir skrifar
Margrét Árdís Ósvaldsdóttir forstöðumaður Seljahlíðar og Þorleifur Hauksson, íbúi Selahlíðar og fyrsti íbúi hjúkrunarheimila sem bólusettur verður fyrir kórónuveirunni á morgun.
Margrét Árdís Ósvaldsdóttir forstöðumaður Seljahlíðar og Þorleifur Hauksson, íbúi Selahlíðar og fyrsti íbúi hjúkrunarheimila sem bólusettur verður fyrir kórónuveirunni á morgun. Vísir/Egill

Bólusetning 20 heimilismanna á hjúkrunarheimilinu Seljahlíð fyrir kórónuveirunni á morgun mun breyta litlu fyrir starfið fyrst um sinn, að sögn forstöðumanns. Allir séu þó mjög spenntir fyrir bóluefninu, þar á meðal Þorleifur Hauksson, íbúi Seljahlíðar og sá fyrsti utan heilbrigðisstéttar sem bólusettur verður fyrir veirunni á Íslandi.

Fjórir heilbrigðisstarfsmenn í framlínu verða sprautaðir með bóluefni lyfjaframleiðandans Pfizer um klukkan 9 í fyrramálið, samkvæmt tilkynningu frá almannavörnum. Fjórmenningarnir verða þeir fyrstu til að fá sprautuna á Íslandi. Ekki hefur komið fram hverjir þessir heilbrigðisstarfsmenn eru.

Bólusetningin mun fara fram á fjarfundi sem sendur verður út í beinni útsendingu, meðal annars á Vísi. Útsendingin verður í anda upplýsingafunda almannavarna sem verið hafa á árinu.

Aldrei neinn vafi

Næsti hópur í röðinni er starfsfólk Landspítalans og fólk á hjúkunarheimilum. Í seinni hópnum er það áðurnefndur Þorleifur sem fær fyrstu sprautuna. Hann ræddi bólusetninguna við Vísi fyrr í dag og var jafnframt spurður út í hana í beinni útsendingu í kvöldfréttum Stöðvar 2.

Þorleifur sagði bólusetninguna leggjast vel í sig og kvaðst ekkert stressaður. Margrét Árdís Ósvaldsdóttir, forstöðumaður í Seljahlíð, hefði borið þetta undir hann.

„Margrét kom til mín og spurði hvort ég væri til í þetta.“

Og það var aldrei neinn vafi?

„Nei.“

Breytir litlu en spenningurinn mikill

Alls verða tuttugu íbúar Seljahlíðar bólusettir á morgun. Margrét sagði í beinni útsendingu að bólusetningin á morgun muni ekki breyta miklu fyrir hjúkrunarheimilið, í það minnsta fyrst um sinn.

„Spenningurinn er vissulega mjög mikill samt. Hér eru tuttugu hjúkrunaríbúar en það eru aðrir 50 sem búa í þjónustuíbúðum og þeir eru ekki alveg fremst á listanum. Þannig að þetta breytir ekki miklu í umgengninni hér. Og svo er náttúrulega aftur bólusett eftir þrjár vikur þannig að þetta breytir engu strax. En þetta kemur og vonandi verðum við komin öll með bólusetningu í lok mars,“ segir Margrét.

Þorleifur, 63 ára, er sá yngsti sem fær Pfizer-sprautuna á morgun en sá elsti er 103 ára, að sögn Margrétar.

Hún kvað að vel hafi verið ígrundað hvernig bólusetningin, hvar fjölmiðlum hefur verið boðið að vera viðstaddir, eigi að fara fram í ljósi heimsóknartakmarkana sem hafa verið í gildi. Niðurstaðan var að skipta matsalnum í tvö sóttvarnahólf. Þorleifur verði bólusettur í öðru þeirra og fjölmiðlar fylgjast með í hinu hólfinu.

Viðtal Nadine Guðrúnar Yaghi fréttamanns við Þorleif og Margréti í kvöldfréttum Stöðvar 2 má finna í umfjöllun um komu bóluefnisins í spilaranum hér fyrir neðan. Viðtalið byrjar á mínútu 2:27.


Tengdar fréttir

Klár í sprautuna: „Það sögðu allir nei, nema ég“

Þorleifur Hauksson verður fyrsti íbúi á hjúkrunarheimili til þess að fá bólusetningu við Covid-19 hér á landi. Eins og fram hefur komið eru framlínustarfsmenn og íbúar á hjúkrunarheimilum í forgangi.

Útlit fyrir að sex skammtar leynist í hverju glasi

Útlit er fyrir að hægt verði að ná sex skömmtum í stað fimm úr hverju glasi af bóluefninu frá Pfizer og BioNTech sem barst hingað til lands í morgun. Einfaldur útreikningur leiðir í ljós að skammtarnir telja þá tólf þúsund í stað tíu þúsund.

„Þigg bólusetningu þegar kemur að mér“

Starfsmönnum bráðamóttöku Landspítalans eru farin að berast boð í bólusetningu. Þetta staðfestir Ragnar Freyr Ingvarsson, umsjónarlæknir göngudeildar Covid-19. Sjálfur hefur hann ekki fengið boð en segist afar rólegur; mikilvægast sé að bólusetja aldraða og þá sem eru í nánum samskiptum við sjúklinga.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.