Kveið mest fyrir því að segja mömmu

„Trans var eitthvað sem ég hafði ekki einu sinni heyrt um,“ segir móðir Ólivers Elí, en hann segir sögu sína í öðrum þætti af Trans börn sem sýndur er í kvöld á Stöð 2. „Ég kveið örugglega mest fyrir að segja mömmu minni frá þessu,“ segir Óliver Elí meðal annars í þættinum. Í þættinum fá áhorfendur meðal annars að fylgjast með honum í hormónameðferð.

Í kvöld verður einnig sýnt áfram frá sögu Gabríelu Maríu en hún er orðin 15 ára í dag og hefur verið á hormónablokkerum í nokkur ár sem hefur mikil áhrif á hennar andlega líðan. Þátturinn er á dagskrá Stöðvar 2 strax á eftir fréttum, en er þó ekki í opinni dagskrá eins og fyrsti þátturinn. Þeir sem vilja sjá fyrri hlutann af sögu Gabríelu Maríu geta horft á þáttinn í heild sinni á Stöð 2 Maraþon og hér á Vísi. 

Sjá einnig: Trans börn í heild sinni: Alex Grétar og Gabríela María 

Trans börn er vönduð ný heimildaþáttaröð í þremur hlutum þar sem fjórum íslenskum fjölskyldum er fylgt eftir yfir tveggja ára tímabil. Allar fjölskyldurnar eiga það sameiginlegt að innan þeirra er barn sem upplifir sig í öðru kyni en því sem þeim var úthlutað við fæðingu.

Annar þáttur af Trans börn er á dagskrá Stöðvar 2 klukkan 19:05 í kvöld. Framleiðandi þáttanna er Sveinn Benedikt Rögnvaldsson, Sigrún Ósk Kristjánsdóttir sér um umsjón og klippingu annast Fannar Scheving Edwardsson. Friðrik Friðriksson sá um myndatöku.