Slökkviliðið á höfuðborgarsvæðinu sinnir nú útkalli eftir að tilkynnt var um eld á Grensásvegi 1 í Reykjavík. Eldur kviknaði í rusli fyrir utan húsið og lagði töluverðan reyk af honum. Slökkviliðsmenn vinna nú að því að reykræsta húsið.

Kvikmyndaskóli Íslands hefur verið til húsa á Grensásvegi 1 en samkvæmt upplýsingum slökkviliðsins er engin starfsemi í því nú. Eldurinn kviknaði í rusli utandyra en var slökktur fljótt. Slökkviliðsmenn brutu sér leið inn í húsið til að ræsta úr reykinn.

Helgi Túliníus, varðstjóri hjá lögreglunni á höfuðborgarsvæðinu, sagði í kvöldfréttum Stöðvar 2 að eldurinn hefði kviknað í spýtnabraki við dælustöð í kjallara hússins. Lögreglumenn hafi í fyrstu reynt að slökkva í með slökkvitæki en slökkviliðsmenn hafi endanlega slökkt í eldinum.

Í ljós hafi komið að eldurinn hafi læst sig í loftútblástur frá dælustöðinni. Slökkviliðsmenn hafi því farið inn í húsið til að kanna með skemmdir og reykræsta. Helgi sagði að ekki virtist hafa orðið mikið tjón og að húsið hafi verið mannlaust. Rannsakað verði hvernig eldurinn kviknaði.

Fréttin hefur verið uppfærð.