Umferð á höfuðborgarsvæðinu í júlí dróst saman um 3,4 prósent milli áranna 2019 og 2020. Umferð á höfuðborgarsvæðinu frá áramótum hefur þá dregist saman um 8,9 prósent miðað við sama tímabil á síðasta ári. Þetta kemur fram á vef Vegagerðarinnar.
Mesti samdrátturinn á höfuðborgarsvæðinu í júlí milli ára mældist á Hafnarfjarðarvegi. Þar dróst umferð saman um 8,9 prósent. Minnstur var samdrátturinn um mælisnið Vegagerðarinnar á Rekjanesbraut, eða 0,7 prósent. Reykjanesbrautin mælist umferðarmeiri en Hringvegurinn og Reykjanesbraut.
Eins og áður sagði hefur umferð á höfuðborgarsvæðinu dregist saman um 8,9 prósent frá síðastliðnum áramótum miðað við sama tímabil á síðasta ári. Það er þrisvar sinnum meiri samdráttur en áður hefur mælst á höfuðborgarsvæðinu. Þessi samdráttarsveifla hefur ekki verið rannsakað, samkvæmt tilkynningu Vegagerðarinnar, en sú tilgáta er sett fram að mögulega skýrist hún af því að Íslendingar haldi í meira mæli út á Hringveg en á „venjulegu ári,“ eins og það er orðað. Þar er vísað til þess ástands sem skapast hefur í samfélaginu vegna kórónuveirufaraldursins.
Sé umferðin á höfuðborgarsvæðinu í júlí milli ára skoðuð eftir vikudögum kemur í ljós að hún dróst saman alla dagana. Minnst dróst hún saman á mánudögum en mest á föstudögum. Minnst var ekið á sunnudögum en mest á fimmtudögum.
„Nú þegar um 60% er liðið af árinu 2020 lítur út fyrir að umferðin geti dregist saman um 8% á höfuðborgarsvæðinu. Ekki er búist við að umferð aukist í neinum mánuði, sem eftir er ársins. Það verður hins vegar mjög fróðlegt að sjá hvernig umferðin verður í haust en september hefur gjarnan verið umferðarmestur á höfuðborgarsvæðinu,“ segir þá í tilkynningu Vegagerðarinnar.
