Sóttvarnalæknir vill rannsaka hvort kórónuveiran sem veldur Covid-19 sé að einhverju leyti vægari nú en á fyrri stigum faraldursins. Aðeins 5% þeirra sem hafa komið í sýnatöku hjá heilsugæslunni með einkenni hafa greinst smitaðir af veirunni. Tölur yfir fjölda smitaðra undanfarna daga eru svipaðar og á upphafsstigum faraldursins í vetur.
Átta greindust með Covid-19 innanlands í gær og þar af voru fimm í sóttkví. Alls eru nú áttatíu í einangrun með virkt smit. Einn liggur á sjúkrahúsi en sá er ekki á gjörgæslu. 670 eru í sóttkví.
Til greina kemur að skima eftir slembiúrtaki víðar um landið, líkt og gert var á Akranesi í gær, en enginn af þeim ríflega sex hundruð sem þar voru skimaðir var smitaður af veirunni.
Álag á heilsugæslunni
Heilsugæslan annast sýnatöku þeirra sem finna fyrir einkennum. Alma Möller landlæknir segir að brugðist hafi verið við athugasemdum frá fólki sem ekki hafi komist í sýnatöku þótt ástæða væri til.
„Heilsugæslan er búin að bregðast vel við og bæta vel í. En ég bendi á að þeim er vandi á höndum því að það eru ekki nema 5% sýna sem eru tekin vegna einkenna sem eru vegna Covid-19 og það endurspeglar auðvitað að þau eru búin að lækka þröskuldinn og ég vil þakka fyrir það,“ segir Alma.
Athyglisvert er að bera saman tölur yfir fjölda smitaðra nú og við upphaf faraldursins í vetur. Þann 4. mars, þegar fyrsta innanlandssmitið var dagsett, voru alls 24 í einangrun með Covid-19. Daginn eftir voru þeir orðnir 37. Á fimm daga tímabili, dagana 6. til 10. mars, fjölgaði virkum smitum síða úr 47 í 82. Þessar tölur frá því í mars svipa mjög til þróunarinnar síðustu fimm daga, en síðan 29. júlí hefur virkum smitum fjölgað úr 39 í 80.
Thor Aspelund, velti vöngum yfir því á Facebook-síðu sinni í dag hvort tímabært væri að tala um aðra bylgju faraldursins.
„Það segir sig sjálft að við erum með aukningu á tilfellum og það er bara smekksatriði hvort menn vilja kalla það nýja bylgju eða ekki,“ segir Þórólfur Guðnason sóttvarnalæknir.
Hann telur tímabært að skoða hvort sama sjúkdómsmynstrið sé í gangi nú og áður, til að unnt sé að leggja mat á það hvort stofn veirunnar sem nú er við að kljást sé vægari en á fyrri stigum faraldursins. „Ég held að það sé lykilatriði að reyna að svara þeirri spurningu,“ segir Þórólfur.
„Við getum rýnt í okkar gögn og reynt að lesa eitthvað út úr því og við ætlum líka að reyna að fá upplýsingar erlendis frá, hvort að menn þar eru að skoða þetta sama. Því að ef að niðurstaðan er sú að svo sé, að veiran sé kannski eitthvað vægari, að þá mun það vissulega geta haft áhrif á þau plön sem við erum með.“
