Álftarparið á Árbæjarlóni virðist hafa misst annan ungann sinn

Álftarparið sem heldur til á Árbæjarlóni virðist hafa misst annan ungann sinn. Hræ, sem virðist vera af álftarunga, má sjá liggja hálfmarandi í kafi í árkvísl við Árbæjarstíflu.

Álftin verpir árlega í Blásteinshólma neðan Breiðholtshvarfs en hreiðrið er jafnan á sama stað skammt ofan stíflunnar. Í vor komust aðeins tveir ungar úr hreiðrinu en algengt er að þeir séu fjórir til fimm talsins og raunar komust sex ungar á legg sumarið 2016.

Þar til fyrir fáum dögum voru ungarnir tveir með foreldrum sínum. Núna sést álftarparið synda um með aðeins annan ungann á lóninu. Virðist sem hinn unginn hafi drepist af einhverjum orsökum.

Ekki virðist í fljóti bragði hægt að álykta út frá aðstæðum hvað hafi orðið honum að aldurtila. Nærtækast er því að álykta að dauða hans megi rekja til náttúrulegra orsaka.

Sumarið 2018 gerðist það einnig að það fækkaði um einn í ungahópnum þegar leið á sumarið.

Álftafjölskyldan hefur jafnan verið mikill gleðigjafi þeirra sem ganga reglulega um Elliðaárdal, eins og sjá mátti í þessari frétt Stöðvar 2 í fyrra:

Hér má sjá þegar ungarnir voru sex talsins sumarið 2016: