Innlent

Lögregla kölluð til vegna fjúkandi trampólína

Sylvía Hall skrifar
Tvær bifreiðir urðu fyrir skemmdum í morgun vegna fjúkandi trampólína.
Tvær bifreiðir urðu fyrir skemmdum í morgun vegna fjúkandi trampólína. Vísir/Vilhelm

Lögreglan á höfuðborgarsvæðinu hafði í nógu að snúast í morgun og í dag. Alls voru 27 mál bókuð frá klukkan fimm í morgun og til 17 nú síðdegis.

Um klukkan níu í morgun var óskað eftir aðstoð lögreglu vegna pars sem hafði látið greipar sópa á gistiheimili í miðborg Reykjavíkur. Munirnir voru endurheimtir eftir að konan fannst.

Þá var ítrekað kvartað undan ónæði og hegðunar manns við veitingastað í miðborginni og var manninum vísað út. Þá var hann jafnframt beðinn um að koma ekki aftur á staðinn. Eftir hádegi í dag þurfti lögregla svo að aka konu heim til sín þar sem hún hafði verið ölvuð og til vandræða á veitingahúsi í Grafarvogi.

Klukkan fimm í morgun var tilkynnt um slagsmál í Kópavogi þar sem vinir voru að rífast og slást. Báðir hlutu nokkra áverka en vildu ekki blanda lögreglu í málið.

Fjúkandi trampólín var einnig á meðal verkefna lögreglu en rétt fyrir klukkan tíu barst tilkynning um að eitt slíkt hefði fokið í Hafnarfirði. Einn bíll varð fyrir skemmdum og var trampólínið fjarlægt. Snemma í morgun var annað samskonar mál í Mosfellsbæ og varð bifreið einnig fyrir skemmdum í það skiptið.

Í hádeginu var tilkynnt um þjófnað í matvöruverslun í miðborginni. Sakborningur viðurkenndi brotið og var skýrsla tekin á vettvangi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.